“Татарстан” телерадио ширкәте янындагы электр станциясе шартлады
31.08.2010
31 август төнендә Казанның Мәскәү районындагы “Яңа гасыр”, “Татарстан” телерадиоширкәтләре янына урнашкан электр станциясе шартлый. 80 меңгә якын кеше утсыз кала, шулай ук “Татарстан” телевидениясенең милкенә дә күпмедер зыян килә.
Күп кешеләрнең өйләрендә суыткычлары эреп ага. Халык борчуга кала. Мәскәү һәм Киров районының бер өлешендә яшәүчеләр иртәнге 9га хәтле утсыз утыра.
“Безне кырыйда үсеп утырган агачлар коткарды, хуҗалык өчен кирәк булган эш коралларын саклый торган зур тимер тартма таш астында калды һәм төп бинаның бер почмагына станциянең авып төшкән дивары өлешчә зыян китерде. Гадәти эш көне булса, каза зуррак та булыр иде”, ди ГТРК “Татарстан” телевидениясе вәкилләре.
ГТРК "Татарстан" агачлары шартлаудан соң, Владимир Клевинский фотосы “Татар-информ” мәгълүмат агентлыгы хәбәренә караганда, август аеның соңгы көнендә, иртәнге сәгать икеләрдә Энергетиклар урамы, 8нче йорт адресы буенча урнашкан ярдәмчел электр станциясе шартлый. Нәтиҗәдә 3 катлы кирпеч бинаның стеналары җимерелеп төшә. Бу станция “Яңа гасыр” һәм “Татарстан” телерадиоширкәтләре урнашкан җирлеккә терәлеп үк тора, беренче булып бу хәлне сакчылар күрә.
Җимерелгән станцияне тикшергән белгечләр, бу бина эчендәге иске трансформатордан май агып чыгып, станция эче янып китә торган газ белән тула һәм шартлау була, дип белдерә.
Русиядә мондый хәл беренче тапкыр гына түгел. Бу елның 20 августында Петербурда шуңа охшаш гадәттән тыш хәл булып, ярты шәһәр бер сәгатькә якын утсыз калган иде.