Accessibility links

Кайнар хәбәр

İldä nilär bulıp yata? - 29.II.2008


►Tatar milläte oyışıp betkänme? ►Käbisä yılınnan närsä kötärgä bula? ►Däwlät Şurası referendum turında söyläşte






►Tatar milläte oyışıp betkänme?

Qazan üzägendäge Bauman uramında elekke matbuğat yortı häm härkemgä bilgele kitap kibete yabılğannan soñ, tatar aşları yortı qarşındağı “Nur-market” kibeteneñ cirastı ğalereyasendä milli kitap kibete açıldı.

Yaña kitap kibetenä kerü şaqtıy qatlawlı. Monıñ öçen Bauman uramınnan Astronomiçeskiy uramına borılğaç, cir astına töşep kitärgä kiräk. Anı açu öçen kitap näşriäte “Nur-market” şirkätennän 230 kuadrat metr mäydannı arendağa alğan.

Xäzer bu kibet milli cämäğatçelek öçen möhim mädäniät uçağına äylände. Biredä tatar telendä çıqqan yaki Tatarstan häm tatar xalqı turındağı kitaplarnıñ küplege küzlärne qamaştıra. ädäbiyat söyüçelärne cälep itär öçen bu kibetne ğamälgä quyuçı Tatarstan kitap näşriyatı här pänceşämbe könne biredä avtorlar belän oçraşular ütkärä. 28 fevral könne cirastı kibeteneñ qunağı Rafail Xaqimov buldı. Anıñ “Tatar ruxı” kitabın täkdim itü çarası ütte.

Ädäbiyat häm milli fiker yaratuçılar pänceşämbe töştän soñ biregä çaqırılsalar da, çaqırılmasalar da kilä. Bu yulı zalda cıyılışuçılar arasında Svedlau ölkäsendäge tatar balalar baqçaları tärbiäçeläre dä buldı.

Milli xäräkät ägzaları, jurnalistlar, yazuçılar Rafail Xaqimovnıñ “Tatar ruxı” dip atalğan kitabı belän tanışırğa ğına tügel, ä xäzerge milli tormış turında yaña fikerlär işetergä kilgännär. Häm alar bu oçraşudan qanäğat bulıp qaldı.

Bolğardağı häykällärneñ xäle, tarixi yadkärlär belän berrättän distädän artıq iske yortlarda keşelär yaşäwe, andağı transport häm yullarnıñ tözek bulmawı turında da süz çıqtı. Rafail Xaqimov, iske yortlarnı küçerü öçen berär yaña bina buldırunı tuzğan toraq fondına täkdim itelüen äytte:

“Min bu mäsälä belän küp yördem. Prezident ul yortlarnı küçerü turındağı qararğa qul quydı. Tälğat Abdullin belän min berniçä tapqır söyläştem, eşlim dip wägdä birgän ide.”

Monda cıyılışuçılarnıñ berse dä Şähri Bolğarnı tözekländerü mäsäläseneñ xökümät başlığı qatnaşlığında qaraluın işetmägännär. Ä bit yaqın arada Bolğarnıñ infrastrukturası häm muzey kompleksı yañartılu turında xäbär Azatlıqnıñ 26 fevral tapşıruında yañğırağan ide. Zalda utırğannar monı belep alğaç, Azatlıq radiosın tıñlau mömkinlege turında soraştıra başladı. Şunnan soñ alarğa radionı tıñlau mömkinlekläre turında añlatma birelde.

---------------------------------------------------------------------------------------------

►Käbisä yılınnan närsä kötärgä bula?

29 fevral başlanıp kitü belän keşelär qayda nindi kötelmägän xäl bulır ikän dip kötep yörgän kebek. Nişliseñ, xalıqta elektän ük käbisä yılı qayğı kiterä digän ışanular yöri.

2000 yılda “Kursk” su astı köymäseneñ batuı, “Ostankino” manarasınıñ yanuı, şulay uq käbisä yılında - 1988dä - Ärmänstanda 23 meñ keşeneñ ğomeren alğan köçle cir teträw buluı, “Titanik” köymäseneñ batuwı xalıqqa tağın da qurqınıçlıq xisen östi.


Küplär käbisä yılınnan xäwef kötsä dä, belgeçlär, bu yılğa häm andağı ber artıq köngä ğadäti küreneş dip qararğa quşa. Ni öçen digändä, bu Yuliy Tsezar tarafınnan kertelgän yıllıq cädvälneñ näticäse genä. Belgeçlär isä 29 fevral qaydan barlıqqa kilüen bolay añlata. Ber yılda 365 kön dielsä dä, bu könnärdän tış här el tağın 6 säğat qalıp bara ikän, şulay bu säğatlär ber täülekkä cıelğançı 4 el uza. Şuña kürä belgeçlär bu sannarğa ällä ni ähämiyat birmiçä, alarnı san kebek kenä qabul itärgä çaqıra.

---------------------------------------------------------------------------------------------

►Däwlät Şurası referendum turında söyläşte

Tatarnıñ milli köräşe äkrenläp bülletennärneñ tatarça da bastırıluın dawlawğa qaytıp bara.
Bügen Qazannıñ zur türäläre Däwlät Şurası utırışında qatnaştı. Deputatlar kön tärtibendä mäsälälär küp bulsa da, referendum turındağısı ayıruça küp bäxäslär çığarğan, dip yaza agentlıqlar.
Bu utırışnı däwlät radiosında turı efirda tapşırmadılar. Anda bulğan xällärne agentlıq xäbärlärnnän genä çamalap buldı. Referendum qanunına täkdim itelgän tözätmälär arasında bülletenneñ qaysı teldä buluı turındağısı da bulğan. Ul bülletenneñ niçä teldä basılaçağın üzäk Saylau komissiyase xäl itergä tiyeş ikän.

Rusiäneñ Tatarstandağı prokurorı bülletenneñ urısça ğına basıluın taläp itkän. Ber törkem deputat moña qarşı çıqqan, Tatarstan konstitutsiyasendä däwlät telläre mäsäläse inde xäl itelgän, digän.

Agentlıqlar yazğança, axırda parlament räise Färit Möxämmätşin üzäk saylaw komissiyase wäqalätläre federal üzäk belän kileşü nigezendä bülengän, dip cawap birgän. Näticädä, deputat Robert Miñnullin täqdim itkän tözätmä qabul itelgän. Anda ul, bülletennärne qaysı teldä bastıru mäsäläsen respublika wäqalätlärenä kertergä kiñäş itä.

XS
SM
MD
LG