Accessibility links

Кайнар хәбәр

İldä nilär bulıp yata? - 02.VI.2008


►2013 yılda Universiada Qazanda uzaçaq ►Qazanda mäğärifne yaqlap miting yasıylar ►Qazanda etlärgä tıyılğan ağu atılamı?



--------------------------------------------------------------------------------------------

►2013 yılda Universiada Qazanda uzaçaq

Röstäm Miñnexanov Brüsseldä tatarça itep tä räxmät dide.

Bu qarar şimbä könne Bryüssel şähärendä iğlan itelde. Röstäm Miñnexanov FISU komissiasenä tatar telendä "räxmät" dide.

Qazan 2013 yılğı universiada oyıştıru yarışında ciñep çıqtı. Şimbä könne Bryüssel şähärendä 2013 yılda bötendönya student uyınnarınıñ şulay itterep Tatarstanda bulçağı iğlan itelde. XXVII Cäyge Universiadanı üzendä ütkärü öçen öç şähär köräşkän ide: Vigo (İspania), Guan Cu (Könyaq Qöreyä) häm Qazan (Tatarstan).

"Tatarstan - Yaña Ğasır" telewideniese ciñüçe şähärne iğlan itü tantanasın turı efirda kürsätte. Şulay itterep "Tatarstan - Yaña Ğasır" qanalı aşa tarixi waqıyğa xäbär itelde.

Bilgele bulğança, Qıtaydağı Xarbinda 2009 yılda xalıqara qışqı universiada ütäçäk. 2011 yılğı cäyge universiada isä şunda uq Şençjen şähärendä bulaçaq. Miñnexanov citäkçelegendäge räsmi törkem Qıtayğa barıp alarnıñ täcribäsen dä öyränep qayttı. Şulay uq şuşı yullardan ul Afrikağa da, xätta İranğa yäki Uğandağa da barıp çıqqan ide.


--------------------------------------------------------------------------------------------

Qazanda mäğärifne yaqlap miting yasıylar

Tatar zıyalısın milli töbäk komponentı mäsäläse borçıy.

Düşämbe könne Kamal teatrı qarşında milli töbäk komponentın mäktäptä saqlap qalu buyınça miting yasala.

Düşämbe könne Kamal teatrı qarşında milli töbäk komponentın mäktäptä saqlap qalu buyınça miting yasala. Ul milli mäğärifne yuqqa çığaruçı federal' qanunğa qarşı oyıştırıla. Ul çara da ikençe tapqır yasala. Bu turıda aktivist İskändär Siraci xäbär itä. Bu çara yasalaçağın milli xäräkättän Räfis Cämdixan, Nail Näbiullin da raslıy.

Tatarstan prokurorı da Tatarstannıñ “Mäğärif turında”ğı qanunın Rusiä qanunına täñgälläşterelüen taläp itä. Şulay uq, mäktäplärdä direktorlar tarafınnan "tatar tele betä" digän süzlär yışraq äytelä häm ata-analarğa da şuşı mäğlümat citkerelä ikän. Şulay uq optimälläşterü yäki qısqartılu, dip qayber tatar mäktäpläre dä Tatarstanda yabıla.

Şundıy miting tatar-törek mäğärifen yaqlap ta uzarğa tieş. Tik soñınnan anısı kiçekterelüen xäbär ittelär.

--------------------------------------------------------------------------------------------

Qazanda etlärgä tıyılğan ağu atılamı?


Tatarstannıñ xaywannar yaqlawçı yäşlär oyışması “Zoospas” wäkilläre tikşerü näticälären kötä. Ekspertiza tizdän bilgele bulırğa tieş.

Qazanda xucasız xaywannarnı awlaw berläşmäse başlığı Röstäm Nurullin alarnıñ xezmäte 2007 yılda 31 meñ etne totuın häm anıñ 26 meñeneñ yoqlatıluın äytte.

Wäxşilekkä tüzep tora almağan xaywannarnı yaqlawçılar küptän tügel genä piket oyıştırdı. 20-läp keşe etlärne üterüne tuqtatıp, sterelizasialäw taläbe quydı.

Belegeçlär kitergän sannarğa tayanıp alar, ägär sterilizasia döres alıp barılsa, berniçä yıl eçendä etlär aqrınlap kimi başlar ide di. Ämma… “Alar kübräk ütergän sayın tabiğät yuğaltunı kire qaytarırğa omtıla. Elek etlär 5-6nı törle cenestäge bala kiterä ide. Xäzer Qazanda etlärne küpläp yuq itä başlağaç, ana etlär 12-15 bala taba häm barsı da qızlar”,- di “Zoospas” başlığı Svetlana Naydyonova. Alarnıñ internetta üz säxifäläre dä bar. www.zoospas.ru . Bu xezmätegez öçen aqça qayan alasız? digän sorawğa ul: “Yärdäm itüçelär bulğalıy. Oyışma wäkilläre dä qullarınnan kilgän qädär yärdäm itä. Min üzem invalid. Pensiä aqçasınnan säxifä totu öçen häm başqa eşlärgä öleş çığarırğa tırışam”,- dide.
XS
SM
MD
LG