Шәһәр хакимияте белән килешенеп оештырылган урам җыенында яңгыраган чыгышларда 4 декабрь сайлауларының гадел узмавы әйтелде. Төп чыгышны Татарстан коммунистларының юлбашчысы Хафиз Миргалимов ясады.
Митингка килүчеләр мәйданга баштан-аяк тентелеп кертелде. Коммунистларга “Яблоко”, “Правое Дело” фиркаләре, урыс милләтчеләре оешмасы вәкилләре теләктәшлек күрсәтте.
Узган шимбәдә Казанның Ирек мәйданына меңләгән кеше җыелган иде. Бүгенге чарада хакимият фиркасенә каршы чыгучыларның саны ким булмады.
Чыгыш ясаучылар киләсе атна, 24 декабрьдә булачак чираттагы ризасызлык чарасында халыкны актив катнашырга чакырды.
Коммунистлар хакимият фиркасен урлашуда гаепли
18 декабрьдә Казанның Ирек мәйданында Татарстан коммунистлары Русия думасын сайлау нәтиҗәләренә ризасызлык белдереп митинг үткәрде.
