АКШ һәм Канада быел Аляска яр буйларында Русия белән хәрби күнегүләр үткәрүдән баш тартты. Бу хакта пәнҗешәмбе Төньякамерикан континенты һава-галәм саклану берәшмәсе вәкиле Чарльз Марш белдерде.
Аның сүзләренчә, АКШ саклану министрлыгы һәм Канада премьер-министры Стивен Харпер, Украинадагы вазгыять сәбәпле, әлеге карарга килгән.
"Сизгер бөркет" дип аталган бу күнегүләр АКШ, Канада һәм Русия катнашында 2007 елдан бирле һәр ел саен үткәрелеп килде. Аның максаты - террорчылар үз кулларына төшергән очкычларны диңгез-һава көчләре кире кайтарып алуга өйрәнү. Быелгы күнегүдә Япония саклану көчләре дә катнашырга тиеш иде.