Уфада Русиянең хәрби техника күргәзмәсе ачылды

6 октябрь Уфаның Җиңү паркында Хәрби техника аллеясе ачылды. Аны ачуда Уфа мэры Ирек Ялалов, Икенче дөнья сугышы ветераннары, кадетлар, хәрби-патриотик клубларда тәрбияләнүчеләр, мәктәп укучылары катнашты. Җиңү паркында моңа кадәр дә кайбер хәрби техника һәм кораллар куелган иде. Алар арасында Т-34 һәм Т-55 танклары, пушкалар, зенит корылмаларын күрергә була иде. Хәзер рәт-рәт итеп авыр техникалар тезеп куелды. Алар арасында бронемашиналар, үзйөрешле зенит корылмалары, десант машиналары, ракетага каршы комплекслар һәм минометлар бар.