Төркиянең күзләү оешмасы илдәге гаскәр фетнәсе бастырылды дип белдергән. Бу хакта Төркиянең NTV телеканалы хәбәр итә. Телеканал хәбәрләренә күрә, түнтәрелештә катнашучылар кулга алган Төркиянең хәрби идарәсе башлыгы Һулуси Акар азат ителгән һәм ул вазифаларына керешкән.
Истанбул үзәгендәге Таксим мәйданында түнтәрелештә катнашкан дистәләрчә хәрби коралларын тапшыра, аларны полиция машиналарында алып китәләр, дип хәбәр итә Reuters күрүчеләргә таянып.
Эрдоган Истанбулга килде
Шимбәгә каршы төндә хәрби фетнә вакытында Мәрмәрис шәһәрендә булган Төркия президенты Рәҗәп Эрдоган очкыч белән Истанбулна килде. Һава каланында аны күпсанлы тарафдарлары каршы алды.
Эрдоган: Төркия фетнәчеләр кулына җиңел генә бирелә торган ил түгел
Хәрби фетнә башланганнан соң берничә сәгать югалып торган Төркия президенты Рәҗәп Эрдоган башта CNN Turk телевидениесе аша видеомөрәҗәгать ясап халыкны урамнарга чакырды, соңрак диңгез буендагы Мәрмәрис шәһәрендә журналистлар алдына чыгып Төркиянең фетнәчеләр кулына җиңел генә күчә торган ил булмавын әйтте һәм аларның җәзага тартылачагын белдерде.
Полиция кулга алган хәрбиләр һәм Анкарадагы танк
Кесә телефонына төшерелгән видеода полиция кулга алган хәрбиләр һәм Анкарада хәрби фетнәдә катнашучылар кулындагы танк.
АКШ Төркия хакимиятенә теләктәшлек белдерде
АКШ президенты Барак Обама Мәскәүдә сәфәрдә булган дәүләт секретаре Джон Керри белән Төркиядәге вазгыять турында сөйләште. Аларның Төркиядәге тарафлар демократик рәвештә сайланган хакимият ягында булырга тиеш, көч куллануга, кан коюга юл куярга ярамый дигән фикер белдерә. Бу турыда рәсми белдерү Ак Йорт Twitter'ында чыкты.
Хәрби түнтәрелеш башлап Босфор күперләрен контрольгә алган хәрбиләр
Әнкарадагы атышлар. Хәрби боралак Эрдоган тарафдарларына ут ачты
Төркиянең Бөек Милләт Мәҗлесе (парламент) каршында бәрелешләр бара. Дөньяның иң зур һава юллары ширкәтләре Төркиягә очышларын туктатты. Казаннан төнге 2дә Истанбулга китәсе очкыч китмәде.
Төркиянең дәүләт телевидениесе хәрбиләр кулында
Төркиянең TRT каналында хәрбиләр илдә хакимиятне үз кулларына алулары турында белдерүне кабатлый. Фетнәне оештыручылар халыкны урамга чыкмаска чакыра. "Бу хакимият көчен югалтты", диелә белдерүдә.