Вашингтонда протестчылар белән полиция арасында чуалышлар. Хәбәрчебез Майк Экель видеосы.
Вашингтондагы протест чараларыннан хәбәрчебез Майк Экель видеосы.
Трамп инаугурациясе барган арада, аның хакимияткә килүенә каршы булучылар Вашингтон урамнарына каршылык белдерергә чыкты. Вашингтондагы хәбәрчебез Майк Экель видеосы.
Трамп инаугурация чараларының берсе – элекке президент Барак Обама һәм аның җәмәгате Мишель Обаманы озатты. Алар боралак белән Вашингтоннан китә. Бу – инаугурация традициясе.
Консерватив Foxnews телеканалы комментаторлары Трампның чыгышы классик президент-республиканнарча булмады дип белдерә. Алар Трампның АКШ дөньяга үзенең яшәү рәвешен такмаячак, ә "Беренче чиратта – Америка" дигән сүзләренә игътибар итеп, президент эчке эшләр белән мәшгуль булачак дигән фикердә.
Үз чыгышы вакытында Трамп "радикал ислам террорын җир йөзеннән юк итәчәкбез" дип белдерде. Илгә тугрылык американнарда бер-берсенә ышаныч арттырачак, дип ул ватанпәвәрлек турында да әйтеп китте. Дональд Трампның инаугурация чыгышы 16 минут 12 секунд дәвам итте. Яңа президент җәмгыятьне берләштерергә, яңа күперләр, юллар төзергә, ислам террорын җиңәргә һәм хакимиятне Вашингтон элитасы кулыннан алып, халыкка тапшырырга вәгъдә бирде. Комментар ясаучылар билгеләвенчә, президент буларак беренче чыгышында Дональд Трамп үзенең моңа кадәр дә билгеле сүзләрен кабатлады.
Дональд Трамп – АКШның 45нче президенты
Дональд Трамп чыгыш ясап, АКШның элекке президенты Барак Обама һәм аның җәмәгатенә хакимият күчешендә ярдәме өчен рәхмәт белдерде. Трамп АКШ халкы көткән бөтен авырлыкларны җиңеп чыгарбыз дип әйтте.
"Хөкүмәтнең кайсы фирка контролендә булуы түгел, ә хөкүмәтнең халык контролендә булуы кирәк", диде Трамп.
"Без үз чикләребез турында онытып, чит илләрне сакладык. Үзебезнең ил фәкыйрьләнә барганда, чит илләрдә миллардларча доллар тоттык. Заводлар ябылды һәм башка илләргә күчте. Урта катлам байлыгы башка илләргә акты. Ләкин бу үткәндә калды, чөнки без киләчәккә карыйбыз", диде АКШ президенты.
Вице-президент Пенс ант китерде. АКШ Югары мәхкәмәсе рәисе Робертс Дональд Трампның антын кабул итә.
Сенатор-демократ Шумер чыгыш ясап, илнең һәм дөньяның авырлыкларга очравы турында, әмма АКШ халкына ышаныч белдерүе турында сөйләде. "Без тыныч юл белән хакимиятне тапшыруны күрәбез, без һәркөн Конституциябезнең төп принциплары өчен, Американы Америка иткән өчен эш күрсәтербез", диде Шумер.