Нәҗибә Сафина 1949 елның 2 мартында Башкортстанның Яңавыл районы Кисәк-Каен авылында туган. Әтисе Әхмәтнур – авыл механизаторы, әнисе Нурикамал гади колхозчы. Сигезьеллык белемне туган авылында, урта белемне шул ук районның Карман авылы мәктәбендә ала. 1967 елда Казанга килеп, Казан университетының татар теле һәм әдәбияты бүлегенә укырга керә. 1972 елда укуын уңышлы тәмамлаганнан соң, аны рәсми юллама белән Татарстанның Кама Тамагы районындагы Балтач авылы мәктәбенә укытучы итеп җибәрәләр. 1973 елның башында ук ул Чистай шәһәренә күченә. Үз белгечлеге буенча шәһәр мәктәпләрендә эш урыны булмаганлыктан, берникадәр вакыт мәктәптә рус теле һәм әдәбиятын укыта, аннары бер ел Чистай педагогия училищесында балалар әдәбияты һәм сәнгатьле уку дәресләре алып бара. Шул елларда Чистай район газетының тәрҗемә (дубляж) вариантында аның беренче шигырьләре, әдәби язмалары күренә башлый.
1990 елдан башлап Нәҗибә Сафина Казан шәһәрендә төпләнеп яши. Әүвәл ул ике ел “Шәһри Казан” газетында хәбәрче, бүлек мөхәррире булып эшли, аннары 1993-1996 елларда "Сөембикә" журналы редакциясендә сәясәт бүлеген җитәкли. 1997 елдан әдәби иҗат эше белән генә шөгыльләнә. Нәҗибә Сафина 1997 елдан Язучылар берлеге әгъзасы.
Басма китаплары: "Кош теле", "Таң кошы", "Мәче фәлсәфәсе", "Аккош күле", "Әгәр дә уйлаганда...", "Без – шигырь, тормыш – проза", "Камка һәм яфрак капка", "Кан хәтере" һәм башкалар.