Britaniä, Fransiä häm Germaniä, İrannıñ atom tikşerenülären yañatru turındağı belderüenä üz cawabın äzerläde. Mäsälä irtägä Berlinda qaralaçaq. Yevropanıñ 3 ile, şulay uq Amerika Quşma Ştatları häm Rusiä, İrannıñ bu qararı belän qänäğät tügel. Britaniä premyer-ministrı Tony Blair, mäsäläne Berläşkän Millätlär Oyışmasınıñ İminlek Şurası köntärtibenä quyırğa täqdim itä aluın belderde: "İrannıñ qararı çınnan da bik citdi. Keşelärneñ häm bezneñ borçılunı yäşerep totunıñ mäğnäse yuq, dip uylıym. İran qabul itkän qarar, İzrail turındağı añlatmaların da sanağanda, böten dönyağa citdi qurqınıç tudıra." Rusiä saqlanu ministrı Sergei İvanov, İrannıñ adımına borçılu belderde, häm ul qurqınıç tudıra, dide. Germaniäneñ tışqı eşlär ministrı urınbasarı Gernot Erler, İrannıñ bu qararı – söyläşülärne däwam itü mömkinlegen yuqqa çığara, dip belderde. İran, atom programmasınıñ barı tik tınıç maqsatlarda bulğanın belderä. Prezident Mähmüd Ahmadinecad, İran Könbatışnıñ borçıluınnan qurıqmıy, häm üzeneñ atom eşçänlegen däwam itäçäk, dip belderde.
