Başqa xäbärlärgä kilgändä. Monnan unbiş yıl elek, tatar milli xäräkäte Tatarstan bäysezlege öçen köräş başlap, respublikanıñ däwlät atributları bulsın dip bardı. Şul çaq, yaxşımı, naçarmı, respublika konstitutsiäle dä, gerblı da, gimnlı da buldı. Unbiş yıl ütkännän soñ, yaña buın yäşläre Tatarstanğa yaña gimn kiräk dip bara.
“Üzebez” dip atalğan yaña xäräkät äledän-äle berär ideyä belän çığa tora. Oyışqanına äle berniçä ay ğına buluına qaramastan. Mäsälän, matbuğat ähelläre arasında zur tawış quptarğan “Yaña buın häm matbuğat” dip atalğan tügäräk östälne äytergä mömkin. Anda, tatar jurnalistları nadanraq digän fiker suzılıp bardı. Şul säbäple cämäğätçelektä rizasızlıq tudırdı. Menä, “Üzebez” xäräkäte, tağın ber fiker belän çıqtı. “Tatar brendı, tatar danı” dip atalğan matbuğat klubı utırışında, çärşämbe kiçendä, xäräkät wäkilläre häm anda qatnaşqan belgeçlär, Tatarstannıñ räsmi bulmağan gimnı bulırğa tieş dip belderdelär. Älege tügäräk östäldä, tatar ataması bulğan här törle äyberne - cırmı ul, rizıqmı, texnikamı, niçek itep danlı itärgä, brend däräcäsenä kütärergä digän mä’sälä tikşerelde. Şul isäptän, Tatarstan gimnı mä’säläse dä.
Xäräkät koordinatorlarınıñ berse İlşat Säyetov, Tatarstannıñ xäzerge räsmi gimnı artıq sülpän häm ul däwlätçelek alırğa cıyınğan xalıqnıqına turı kilmi dip sanıy. Xäyer, ul gimnnı üzgärtergä kiräkmi di ul, ä räsmi bulmağanın da kertergä kiräk sanıy. Sülpänme, yuqmı respublikanıñ xäzerge gimnı, tıñlap qarıyq
Аудіо Tatarstan gimnı “Üzebez” koordinatorı İlşat Säyetov häm matbuğat klubında qatnaşuçılarıñ qayberläre, mäsälän, Möselman jurnalistları berlege räise Ğamil Ğibadullin da, Tatarstan gimnı ul, böten tatarlar gimnı bularaq qabul itelä, şuña ul küñelne kütärä, därtländerä torğan bulırğa tieş dip isäpli.
Аудіо “Tuğan tel” cırı Äle yañğırağan “Tuğan tel” cırı milli cämäğätçektä gimn bularaq qabul itelgän ide. Zur yäki keçkenä milli çaralar şunıñ belän başlana, şunıñ belän betä. Tatarstannıñ xalıq artistqası Gölzadä Safiullina “Tuğan tel” cırı gimn bulalmıy di. Säbäbe, älege dä bayağı sülpänlek. Monnan tış, tatarnı dönyağa ber tuğan tel genä tanıtmıy dip sanıy ul. Ä tatarlar gimnsız yäşämägän. Mäsälän, çit ildäge tatar säyäsi emigratsiäseneñ gimnı bulıp, “İdel-Ural marşı” sanalğan. Ä “Kübälägem” cırı? Ul da bit, taralıp yäşägän xalıqnıñ ber küñel kütärgeçe, gimnı bulğan
Аудіо “Kübälägem” cırıDöres, tatarlar yäşägän här töbäkneñ üz cırı, gimnı bar. Soñğı yıllarda da çığa tora. Mäsälän, Salawat başqaruındağı “Başqortstan tatarları” cırı. Monı küplär, bu töbäk tatarlarınıñ gimnı dip qabul itä Аудіо “Başqortstan tatarları” cırı
Läkin, “Üzebez” yäşläre, bolar belän yıraq kitep bulmıy, köçleräk, tarixnı da, däwlät alırğa omtılışnı da, mädäni potensialnı da çağıldırğan, räsmi bulmağan gimn kiräk dip sanıylar.
Räfis Cämdixan
