Accessibility links

Кайнар хәбәр

Dumağa Tatarstannan kitkän deputatlar eşçänlege açıqlandı


Mäskäwdä Qamal teatrı gastrolläre n tantanalı yabuda qatnaşqan mäğlüm säyäsätçe Vladimir Jirinovskiy, üz isemendäge xuşbuy, konyaklar taratıp, tübätäylär kiep tatarlarnı maqtap yörde. Misal itep üzeneñ Dumadağı fraksiäsendäge 3 tatarnıñ bik yaxşı eşlilär dip maqtadı. Niçek eşlägännäre küz aldında. Rusiä vlaçınıñ här äytkänenä läbbäykä dip toruçılarnıñ berse näq menä Jirinovskiy deputatları bit.

Ä Tatarstannan Dumağa saylanğan deputatlar niçek eşli. Respublika xalqı yazmışın yaqlarğa, xoquqlar dawlarğa ant suları eçep känäfigä utırğan Tatarstannan saylanğan 13 deputat turında süz. Bu xaqta tögäl belä alabız. Sişämbedä Tatapolit.ru säxifäsendä Rusiä Dumasındağı Tatarstannan saylanğan deputatlarnıñ eşçänlegen tikşergän yazma dönya kürde. Jurnalist Ruslan Aysin tarafınnan İctimaği ekspertiza institutı mäğlümatlarına nigezlänep yazılğan bu yazmada, respublika xoquqların yaqlarğa tieşle deputatlarnıñ eşçänlege tübän bäyälänä.

Tatarstannan Dumağa 13 deputat saylanğan ide didek. Alarnıñ bişese ber mandatlı okruglardan saylanğan. İsemnären qabatlap torıp waqıtnı almıyq, här töbäk üzeneken xäterlider äle. Här xäldä, saylawlar waqıtındağı alar birgän ballı wäğdälären. Tağın cidese danlıqlı Berdäm Rusiä firqase isemlege aşa deputat känäfienä utırğannar. Berse isä Kommunistlar partiäsennän kitkän. Tatarstannan Dumaga saylanğan deputatlar tarixta ber qayçanda bolay küp bulmağan. Rekord. Rusiä tarixında bulmağan xäl. Ber respublikadan 13 deputat. Yarar, xäzer qısqaça eşçänlekläre belän tanışıyq. Niçek tawış birälär soñ alar. Kommunistlar firqäse aşa uzğan Sapojnikov iptäşne sanamağanda, böten deputatlar da, mäsälän iñ qızu bäxäslär çığarğan zakonnarnı yaqlağannar. Añlaşıla, ul zakonnarnı Putin xakimiäte täqdim itä. Şulay itep, referendum turındağı, Duma deputatların kiläçäktä barı tik partiä isemlege buyınça ğına saylaw xaqındağı zakonnarnı tatarstannı yaqlarğa kitkän deputatlar yaqlağannar. Respublika räsmiläre bu zakonnarğa öleşçä qarşı çıqqan ide. Monnan tış, Toraq fondı turındağı rusiä xökümäte täqdim itkän yaña kodeks läbbäykä dip ütkän. Menä bu yaña kodeksqa nigezlänep, bügen fatir bäyäläre üsä. Bıltır tege taşlamalarnı beterü turındağı zakonnı da, Tatarstannan saylanğan deputatlar räxätlänep yaqlağannar. Ä bit deputatlarnıñ qayber l'gotaları qaldı. Barmaq üzeñä taba tartıla - monısın raslarğa kiräkmi. Yarar, boları ber xäl. Tatarstan citäkçeläre bit, putinnıñ töbäk başlıqların bilgeläp quyu turındağı zakon proyektın nıq tänqitlägännär ide. Nu matur ğına itep. Ä Tatarstannan Dumağa kitkän deputatlarğa respublika pozitsiäse barıber bulğan. Alar, Rusiä prezidentı bilgelärgä tieş dip qul kütärgännär. Ä bit, bu qul kütärüçelär arasında, deputat bulğançı, ministr urınbasarı bulıp eşlägän, räsmi gäzitlärneñ baş möxärrirläre bulğan keşelär dä bar. Nişliseñ, Mäskäwgä kitkäç, xuca alışına inde. Bazarda satılğan et tä bit, yaña xucağa tiz iäläşä.

Menä şundıy eşçänlek. Tağın sannar kiräkme? Räxim itegez. Dumağa xalıq xaqın xaqlarğa kitkän deputatlardan, mäsälän, Ğöbäydullin, Rokitskiy, Salixovlar ber qat ta çığış yasamağannar. Bötenese tügel, mäsälän, Rokitskiy, Qazanğa qaytqaç, bik söylämçekkä äylänä ul üze. Jurnalistlar aldında bigräk tä. Ällä inde, Mäskäw telne yottıra. Başqalarda Duma mimbärenä bik siräk çıqqannar. Tikşerüçelär alar xaqında oçen nizkaya dip yazğannar. Barı tik, vitse-spiker bulıp toruçı Morozov qına urtaça dip bäyälänä. Yäğni, urtaça çığış yasağan. Bu tikşerüdä sannar bik küp. Alarnıñ tağın bersen genä kiteräbez. Rusiäneñ ğämäldäge xakimiäten Tatarstannan saylanğan deputatlar ni däräcädä tıñlıy. Yäğni, xökümät tege yäki monı täqdim itsä, alın-artın, xalıq nujasın qayğırtıp tormıyça 13 deputatnıñ 10 sı 100 protsent kileşä. Morozov belän Möxämmätzakirov deputatlar ğına qaywaqıt qarşı çığa. Ä bolay, yöz oçraqnıñ- 85 bişendä qarşı çığıp tormıylar, alarda. Rusiä xökümäteneñ böten täqdimnären barı tik kommunist Sapojnikov qına qabul itmi. Yöz protsent qarşı çığa. Urıs äytmeşli, ne priznaet.

Menä şundıy ğämällär belän Tatarstannı da, xalıq xoquqların da yaqlıy respublikadan kitkän deputatlar.

Räfis Cämdixan.

XS
SM
MD
LG