Comğa irtäse Bötentatar ictimaği üzäge öçen pikettan başlandı. Älege çaranı ictimaği üzäk Tatarstan Diniä näzaräte qarşında oyıştırdı. Pikettan soñ Bötentatar ictimaği üzäge mäğlümat çaralarına belderülär yulladı. Möxämmät päyğämbärgä karikaturalar yasaldı digän xäbärlär çıqqaç Tatarstannıñ bötentatar ictimaği üzägenä respublikada häm başqa töbäklärdä yäşäwçe möselmannardan äledän äle açulı möräcäğätlär kilä dielä älege belderüdä. Menä qayberläre:
- Dönya xalıqların ber-bersenä qarşı quyu kemgäder faydalı. Keşelär, bu provokatsiälärgä bireşmägez!
- Möxämmät Päyğämbärebezne mäsxäräläwçelärgä näfrät!
- Päyğämbärebezneñ isemen pıçratırğa yul birmäyäçäkbez!
Bötentatar ictimaği üzäge häm respublikanıñ cämäğätçelege islam dönyasın räncetüçe çığışlar yasağan Könbatış mäğlümat çaralarına üzläreneñ qänäğätsezlegen belderä häm demokratiäne, süz iregen uynawğa qarşı çığa. Bu xaqta Bötentatar ictimaği üzäge räise wäkile Yunıs Kamaletdinov imzalağan belderüdä yazılğan ide.
Al'bina Zäynulla
