Accessibility links

Кайнар хәбәр

Uquçılar äfyüngä tikşereläçäk


Yıldan yıl narkomaniä yäşärä. Bu böten Rusiädä şulay. Ä Tatarstanda 100dän artıq yäşüsmer äf'yun qullana. 11 balağa narkoman diagnozı quyılğan. Bu, älbättä, räsmi sannar ğına. Häm mäktäp busağasınnan äf'yun qullanuğa test ütkärgän oçraqta yäş narkomannar sanı, älbättä, kübräk buluı açıqlanır ide. Uquçılar arasında narkomannarnı tabarğa häm alarğa waqıtında yärdäm itügä yunälderelgän älege testlarnı ütkärüne respublika ministrlığınıñ tarmakara komissiäse inde uqu yılınıñ başında xäl itkän ide. Xäzer älege programmanı ütkärü tärtibe häm anıñ metodikası da äzer. Häm yaqın kiläçäktä ul respublika mäktäplärendä qullanıla başlıy.

Ämma balalarğa häm yäşüsmerlärgä äf'yungä test ütkärü federal' qanunğa qarşı kilä. Häm programmanı oyıştıruçılar älege testnı mäcbüri räweştä oyıştırırğa cıyına. Äytergä kiräk, mondıy testlar Rusiäneñ Novorossiysk, Vologda, Mäskäw, Tömän kebek şähärlärendä qullanılışqa kergän. Ämma programmanıñ tiskäre yaqları da yuq tügel. Häm monda uquçılarnıñ äni-ätiläre belän nizağlar ğına tügel, ä testlarnıñ yuğarı bäyäläre dä zur rol' uynıy. Dürt narkotikka tikşerü öçen ber testnıñ bäyäse 150-200 sumğa töşä. Häm bu barı tik material öçen genä, belgeç xezmäte bu xaqqa kermi. Bu summanı däwlät üz östenä ala. Şulay da narkomannı däwalawğa kitkän aqçalar belän çağıştırğanda, bu, älbättä, bik tä az.

Uquçılarnı äf'yungä tikşerügä uqıtuçılar niçek qarıy ikän? Ğalimcan İbrahimov isemendäge gimnaziäneñ ingliz tele uqıtuçısı Güzäl Xäybullina fikeren tıñlıyq:

Minemçä, ul testirovanie mäcbüri räweştä bulırğa tieş tügel. Annarı balalarnıñ yäşenä qararğa kiräk – keçkenä sıynıflarda uquçılarğa närsägä inde ul? Ul bit kübräk ölkän klasslarda uquçılarnıñ probleması. Bu çaranı barı tik ata-analarnıñ röxsäte belän genä eşlärgä kiräk inde. Häm menä tağın ber möhim närsä – ul informatsiä qayda tuplanaçaq? Çönki bu mäğlümatlarnı narkotik satuçılar da taba ala bit. Häm minem uylawımça, ata-analar yäki uqıtuçılar sorawı buyınça barı tik ayırım ber balanı, balalarnı älege test aşa ütkärü yaxşıraq bulır.

Uquçılar öçen testnıñ näticäsen ozaqlamıy belerbez. “İzvestiä Tatarstana” gäzite yazuına qarağanda, Respublikada bügen 10 meñnän artıq narkoman bar. Çınlıqta isä alarnıñ sanı 5, xätta 10 tapqırğa artığraq, dilär belgeçlär. Häm narkomannarnıñ 70%tı - 18-30kä qädärge yäşlär. Ämma studentlarğa mäcbüri äf'yun qullanu-qullanmawğa qarata testlar kertüne mömkin tügel dip sanıylar. Ul keşe xoquqların bozu sanala.

Al'bina Zäynulla

XS
SM
MD
LG