Mäskäwgä kilgän Xämas wäkillege citäkçese Xalid Meşäl İzrailne tanu turındağı sorawnı tikşerü qaralmağan dip belderde. Mäskäwgä kilep citügä Meşäl, Yaqın Könçığış mäsäläsen çişär öçen töp kirtä bulıp, İzrailneñ Fälästin cirlären basıp aluı tora, dip äytte. Xämas delegatsiase bügen Rusiäneñ tışqı eşlär ministrı Sergey Lavrov belän söyläşülär ütkärde. Aldanraq, Lavrov, Rusiä Xämastan İzrailne tanunı häm köç qullanudan waz kiçergä ügetläw niäten beldergän ide. Mäskäwdä, Fälästin Üzidaräse wäkillege yanında Xämasnıñ Mäskäwgä kilüenä qarşı oyıştırılğan röxsätsez miting quıp taratılğan, 7 keşe totqarlanğan dip xäbär itä, radíobız xäbärçese.
