Därwişlär bistäsendä urnaşqan berdänber xastaxanäneñ yabıluı turındağı xäbär cämäğätçelektä borçılu tudırdı. Bıyılnıñ fevral' ayınnan birle 8nçe şähär xastaxanäseneñ yabıluı turında törle imeş-mimeşlär yöri. Räsmi bulmağan mäğlümatlarğa qarağanda bistädäge berdänber däwalaw üzäge urınına respublikanıñ psixiatriä xastaxanäsen küçerü turında da süz alıp barıla. Çärşämbedä “Qazanskie wedomosti” gäzite Därwişlär bistäseneñ däwalaw yortı yabıldı dip xäbär itte. Xastaxanägä şaltıratqaç isä “Azatlıq” radiosına, 8xasataxanäneñ haman da ğämäldä buluın äyttelär. Älege mäs’älägä açıqlıq kertü öçen Qazannıñ Sälämätlek saqlaw idäräsenä möräcäğät ittek. İdäräneñ räis urınbasarı İldar Xisametdinov äytüençä, 8xastaxanä ağımdağı yılnıñ 1aprelennän remontqa yabıla. İnde küptännän remont kürmägän älege däwalaw yortında awırularnı qabul itüdän tuqtağannar, anda elek yatqan xastalar da çığarılğan.
Därwişlär bistäse xalqınıñ häm eşsez qalğan tabiplarnıñ kiläçäk yazmışı nindi bulaçaq soñ? İldar Xisametdinov äytüençä, 8xastaxanädä remont eşläre barğan arada anıñ bülekläre Qazannıñ 5xastaxanäsenä küçereläçäk. Proktologiä bülege 5 şähär xastaxanäsenä küçerelä, terapiä häm nevrologiä Qazannıñ bülek xastaxanäsenä kertelä. Älege nevrologiä bülegendä awırularğa aşığıç bulmağan, plan räweşendäge yärdämne kürsätälär. Ä 7 şähär xastaxanäsendä aşığıç yärdäm kürsätüçe nevrologiä bülege urnaştırıla. Terapiä bülege isä awırularğa aşığıç yärdämne atnanıñ här könendä kürsätäçäk. Sabıylarnı däwalaw öçen 2 balalar xastaxanäsenä möräcäğät itärgä kiräk. İldar Xisametdinov belderüençä, Sovet rayonı xalqı şulay uq 6, 8 häm 13 şähär poliklinikalarında diagnostik tikşerenü ütärgä häm däwalana alaçaq.
8xastaxanädä remont eşläre qayçan tämamlanuı turında Sälämätlek saqlaw idäräse citäkçelege äle xäbärdar tügel. Barısı da finanslawdan tora dip belderde İldar Xisametdinov. Bälki 2007 yılda älege däwalaw yortı üz eşen däwam itär dide. Bu binağa psixiatriä xastaxanäsen küçerü turındağı imeş-mimeşlärne ul kire qaqtı. Ämma respublikanıñ psixiatriä xastaxanäse Sälämätlek saqlaw ministrlığı qaramağında. Ministrlıqta isä älegä bu mäs’älägä xäl itelmägän, aña yaqın kiläçäktä açıqlıq kerteler dip farazlana.
Al'bina Zäynulla
