Bıyılğı qış xalıqnı başta şaqırdatıp qatırdı, ä annarı östebezgä räxätlänep qar işte. Alda - yazğı taşu. Sinoptiklar farazları buyınça, barlıq yılğalar da diärlek yarlarınnan taşıp çığaçaq. Su basularnıñ iñ köçlese Tön'yak Kavkazda, Qalmıqiädä, Stavropol', Krasnodar kraylarında, Kaliningrad ölkäsendä kötelä. Tatarstannı da taşu çitläp ütmäyäçäk. Tatarstanda yazğı taşu aprel'neñ urtalarında başlanır dip kötelä. Bu xaqta respublikada uzğan kiñäşmädä xäbär itelde. Noqrat häm Qama yılğalarında su ğädäti kürsätkeçtän 1,2 metrğa artaçaq. Şulay uq urta İdeldä dä su küp bulaçaq di belgeçlär. Ğädättän tış xällär ministrı Waleriy Vlasov äytüençä, yazğı taşuğa äzerlek eşläre cäy könne ük başlanğan. Respublikanıñ 28 rayonında yılğalarnıñ yulları çistartılğan, 31 rayonnıñ gidrotexnik qorılmalarında häm küllärdä remont eşläre başqarılğan. Remont häm çistartu eşlärenä 47 million sum aqça totılğan. Yazğı taşuğa äzerlek eşlärenä isä barlığı 170 millionğa yaqın sum bülengän. Taşu waqıtında qurqınıç tudırmaw maqsatınnan ğädättän tış xällär ministrlığında biş operativ törkem buldırılğan. Älege eşlärne başqaru öçen mi-8 boralağı da qullanılaçaq dip belderde Waleriy Vlasov.
Yazğı taşu waqıtında respublikanıñ här rayonın diärlek su basa. Yılğalarda su qurqınıç yanıy torğan däräcägä citkän oçraqta yuğaltular zur bulaçaq. Bu xaqta Ğädättän tış xällär ministrlığınıñ Massaküläm mäğlümat çaraları belän eşläw bülege räise Andrey Rodıgin belderde
Bu oçraqta 400dän artıq toraq punktları häm alardağı 70 meñ keşe zıyan kürergä mömkin. Şulay uq 54 xucalıq, 200dän artıq iqtisat obyektları da yuğaltular kiçeräçäk. Su küp cıyılğan oçraqta altı şähärne öleşçä su basarğa mömkin. Süz Qazan, Mendeleewski, Çistay, Alabuğa, Yar Çallı häm Yäşel Üzän turında bara.
Küp kenä yılğalarda inde boz qatlamı neçkärgän. Bu keşe tormışına qurqınıç belän yanıy. Şul säbäple, Tatarstan yılğalarında avtomobil'lär yörüe qatği räweştä tıyıla. Näticälä, “Yuğarı Oslan-Arakçino” häm “Yäşel Üzän-Nijnie Väzovıye” yünäleşlärendä boz aşa çığunı tıya torğan qarar qabul itelde. Şunısı qızıqlı, avtomobil'lärne älege boz yullarınnan çığarunı tıyu yaz citü belän genä tügel, ä texnik qurqınıçsızlıq qağidälären bozu oçraqları artu säbäple dä qabul itelgän.
Al'bina Zäynulla
