Accessibility links

Кайнар хәбәр

Tatarstanda qıtaylar maşina yasayaçaq


Maşina töze, satu zur aqça ul, biznes. Tatarstan ğorurlana, anıñ maşina senäğäte köçle. Ul KamAZ digäne yanıp ta qaradı, barıber maşina çıgarudan tuqtamadı. Böten mir belän kütärdelär KamAZnı. Äle tege Elaz digäne bar ide. Alabuğada maşina zavodı. KamAZda Oka maşinası citeşterelüdän tuqtadı. İñ oçsız bulsa da, satıldı anı citeşterü sänäğäte. Severstal'-avto dip atalğan Rusiäneñ bik köçle şirkäte anı satıp aldı häm anda xäzer Koreya maşinaları citeşteräçäk. İnde alar Oqa kebek oçsız bulmıy. Şundıy maşinalarnı Severstal-avto Semberdä dä citeşterä. Bäyäse 14 meñ dollar. Yäğni 400 meñ tiräse. Qıtaylar da Tatarstan cirendä maşina citeşterä başlıy. Tege Elaz şähärendä – Alabuğada. Alabuğa Rusiädä maxsus iqtisat zonası dip bilgelängän. Yäğni, berniçä yılğa Alabuğada urnaşqan citeşterü şirkätläre salımnan azat itelä. Qıtaylarnı şul da qızıqtırğan buğay. Çönki. Alar başta Leningrad ölkäsennän dä, İrkutski ölkäsennän dä cirlär ezläp qarağannar. Axırda Tatarstan belän kileşkännär. Monda alarıñ oçsız maşinaları yasalaçaq. Belgeçlär süzlärenä qarağanda, maşina bäyäse Tatarstanda yasala başlağaç, tağı da oçsızaya. Älegä ul 12 meñ dollar tora. Qıtaylar zavodnı bu yıl axırına inde tözep betermäkçelär ikän.

Şulay itep, Tatarstan cirendä naçar yullarda da yaxşı yöri torğan, ike çit il maşinası citeşterelä başladı. Xucaları da törle. Konkurentsiä- köndäşlek. Läkin, Tatarstan bit alarnı qızıqsındıra. Qayber mäğlümatlarğa qarağanda, Tatarstan xakimiäte qıtaylarğa tağı da oçsızraq salımnar birü turında wäğdä birgän ikän. Bu xäbärne respublika citäkçelege raslamadı.

İnde, qıtaylarnıñ dönyanı basıp aluları turında küp söylilär xäzer. Xalqı küp, cire az. Şuña kürä yış qına alarğa qarata süzlär işetergä bula. Läkin eşli dä belälär. Qıtay iqtisatı kön üsäsen tön üsä. Alar bazarlarda oçsız çüpräk satuçı ğına tügel. Maşinalar da citeşterälär. Häm muzeylar açalar. Monsı Tatarstannıñ Bua şähärendä. Andağı rayon muzeyenda, ber qıtaylı, arendağa ber bülmä alıp, xalıqnı qıtay mädäniäte häm tarixı belän tanıştıra başlağan.

Räfis Cämdixan

XS
SM
MD
LG