Mäğlüm buluınça, kiläse atna başında Qazanda tatar tele häm ädäbiäte uqıtuçılarınıñ Bötenrusiä qorıltayı üz eşen başlıy. Başqortstan Tatarstanınnan qala tatar tele uqıtuçıları sanı buyınça ikençe urında tora. Şuña da Tatarstanda bu qorıltaynı oyıştıruçılar Başqortstannan yöz uqıtuçını da qabul itä alabız dip äytep quyğan bulğan. Mondıy xäbärne işetü bik şatlıqlı älbättä, ämma şuşı qorıltayğa baru tiräsendä törle añlaşılmawçanlıqlar da tua başlağan. Başqortstan Tatar kongressı Başqarma komitetı wäkilläre Qazanğa säfärne oyıştıru mäs’äläsendä Başqortstan Mäğärif ministrlığına möräcäğät itkän. Ämma anda Başqortstan tatar milli oyışmaları telägänçä, 60-70 keşene tügel, ä nibarı 15 keşene genä cibärergä dip üz isemlegen tözegännär. Şuşı xäl xaqında Başqortstan Tatar kongressı Başqarma komitetınıñ mäğärif mäs’äläläre komissiäse äğzası Ayrat Ğiniätullin söyli.
Başqortstan Tatar kongressı Başqarma komitetınıñ mäğärif mäs’äläläre komissiäse äğzası Ayrat Ğiniätullin buldı bu. Başqortstan tatar tele häm ädäbiäte uqıtuçıları şulay itep Qazandağı qorıltayğa 27 mart könne yulğa çığarğa tieş. Başqortstan xakimiätläre şuşı qorıltayğa cibärü öçen üz törkemen tözesä, tağın berniçä distä uqıtuçı üz aqçalarına häm üz cayı belän digändäy Qazanğa yulğa çığarğa mömkin. Tatar tele uqıtuçılarınıñ Qazandağı qorıltayda qatnaşıığa teläge zur, älbättä. Çönki andıy forsat gel çığıp tormıy. Äle moñarçı andıy cıyınnıñ bulğanı da yuq ide. Ämma Başqortstan xakimiätläre şul qorıltayğa mömkin qädär kübräk tatar uqıtuçısın tuplap cibärü urınına, nibarı 15 keşene genä isemlekkä kertkän. Aları arasında da uqıtuçı bulmağannarı buluı mäğlüm. Üz beldekläre belän, üzallı ğına Qazandağı qorıltayğa barırğa teläwçelär isä qurquğa qalğan – Qazannan qaytuğa alarnı nindi dä bulsa cäza kötmäsme.
