Soñğı yıllarda xäyriä eşläre turında yış işetergä turı kilä. Saylawlar aldınnan ğına tügel, ä başqa waqıtlarda da törle citäkçelär, ğadi keşelär dä yätimnär yortlarına barıp, köçennän kilgän qädär yärdäm itä. Xätta xökem itelgännär dä awır xäldä qalğan balalarğa bitaraf qala almağan. Alar ağaç eşkärtü şirkätendä eşläp, yätimnärgä mebel' komplektları häm tabiğät räsemnären üz qulları belän yasap birgän. Älege koloniäneñ citäkçese Äzfär Kadıyrov äytüençä, bu xäyriä aksiäse xökem itelgännär teläge belän ütkärelgän.
Qazannıñ 2 nomerlı maxsuslaştırılğan nänilär yortınıñ baş tabibı Xäydär Cämdixanov äytüençä, alarnıñ balaları öçen kön sayın diärlek xäyriä eşläre ütkärelä. Nänilär yortınıñ baş tabibı söyli:
Bezneñ nänilär yortına bik küp keşe yärdäm qulların suza. Ayıruça pensionerlar yış kilä. Alar üzläreneñ keçkenä pensiälärenä balalarğa azıq-tölek, kiemnär ala. Balalarıbızğa şulay uq törle oyışmalar, yuğarı däräcäle şäxeslär da yärdäm itä.Yaña ğına Qazan däwlät universitetın tämamlağan yäş belgeç İlnara Märdamşina xäyriä eşläre belän inde küptännän şöğellänä. Alarnıñ ğailäsendä bu eş matur ğöref-ğadätkä äylängän. İlnara üz señlese belän balalar yortlarına bara, awır xäldä qalğan ölkän yäştäge keşelärgä dä quldan kilgän qädär yärdäm kürsätä. İlnara Märdamşina söyli:
Min här eşne dä Allahı Täğälägä bağışlap eşlim. Bezneñ yortta yätim balalar, qarawçısız qalğan ölkän yäştäge keşelär bik küp. Alarğa bez yärdäm itergä tırışabız. Minem küp kenä duslarım da balalar yortlarına bara, mäçetlärgä xäyer kertä. Bu bezneñ öçen normal' küreneş.İlnara äytüençä, xäyriä eşläre turında soñğı waqıtlarda yışraq söyläsälär dä, alarnıñ sanı älläni artmağan. Bu p'yar aksiä räweşendä eşlänä dide ul:
Bez yörgän 1nçe nänilär yortı baş tabibı şulay dip äytte. Yätim balalarğa yärdäm itü elek-elektän kilä. Bu härwaqıt şulay bulğan. Bügenge köndä dä ayırma älläni yuq.Çınlap ta, iğänäçelär süze televidenie-radioda torğan sayın eşraq yañğırıy. Ul ayıruça yätim balalarğa yärdäm itü, estrada cırçıların kütärüdä yış qullanıla. Ä matdi yärdämgä şulay uq moxtaclıq kiçergän milli eşlärgä äle iğänäçelärneñ iğtibarı citmi.
Al'bina Zäynulla
