Tatarstan prezidentı Mintimer Şäymievneñ gäräp illärenä yasağan säfäre düşämbedä tämamlandı. Qazanğa qaytıp kitär aldınnan ul Quwäyt ämire Şäyex Sabax äl- Äxmät äl- Cabbar -äs-Sabax belän oçraştı. Soñğı berniçä kön eçendä prezident Şäymiev Süriä, Söğud Gäräbstanı häm Kuwäyttä bulıp, şul illärneñ biznes dairäsen Tatarstannıñ iqtisadi mömkinlekläre belän tanıştırdı. Dimäşektä ul Süriä prezidentı Başar äl-Asad belän oçraştı. Söğud Gäräbstanınıñ Ciddä şähärendä anıñ Íslam konferensiase oyışması general sekretare İkmaletdin İxsan oğlu belän söyläşüläre uzdı. Şuşı säfärendä Mintimer Şäymievnı Tatarstan möftie Ğosman İsxaqi da ozatıp yörde.
