Tatarstan üzen dönyağa niçek kenä tanıtırğa tırışmıy. Bäysez däwlät tözep bulmağaç, tatar aqılı belän başqaça respublikanı tanıtırğa alındılar. Ul iqtisat diseñme, säyäsi tınıçlıq yäki torğınlıqmı ul, yä bulmasa sport. Respublika räsmiläreneñ ğorurlığı ul, Tatarstannıñ Rubin Aq bars komandaları. Böten ilgä, böten mirgä danı tarala, Tatarstan sportınıñ. Menä, şuşı sport üseşen bu könnärdä Rusiäneñ sport öçen cawalı türäse Veçisav Fetisov öyränep yöri. Ul kilgän töşke, ällä xoday räxmäte, ällä törälär xikmäte, Tatarstan sport komandaları ciñülär dä yawlıy tora.
Qazanda bu aralarda, xalıq ber-berenä nindi soraw birä dip sorasalar, aptırap qalmasqa kiräk. Çönki, nigezdä, tanış-beleş, Xokkeyğa biletıñ barmı dip sorıy. Qazanda xokkey çire. Çönki, Aq bars xokkey komandası, soñı sigez yılda, berençe qat altın medal'gä däğwä itä. Rusiä berençelegenä final uyınnarı bara. İke komanda qaldı. Berse, añlaşıla inde, Aq bars, ikençse, Omskinıñ Avangard komandası. İnde berençe uyın sişämbedä qazanda Aq barsnıñ ciñüe belän tämamlandı. Tağın ber uyın Qazanda uynala, anısı 14 aprel'dä. Öçençe –dürtençe oçraşular Omskida uzaçaq. Şunnan soñ, kem ciñgänen, yäğni Aq barsnıñ Rusiä çempionı bulu-bulmawın beläçäkbez.
Atlas Gafiätov, sport temasına yazuçı jurnalist, şulay uq Aq basrnıñ ciñäçägenä ömet zur dip belderä. Anıñ belän telefon aşa yasağan intevyu şul turıda başlanıp kitte. Annarı, ğomumän, respublikadağı sportnıñ iğtibar üzägendä toruınıñ säbäpläre xaqında bardı.(Audio)
Sez Atlas Gafiatov belän äñğämä tıñladığız.
Respublikada ber xokkey belän futbol ğına üsüdä tügel. Menä bu könnärdä karting, keçkenä maşinalar dip äytikme, şularda yarışır öçen urın açıldı. Şäymiev yalda bit. Ällä şunnan faydalanıp, ällä başqa eşläre yuq, yä bulmasa, preme’rnıñ tanılğan avtouzışçı buluınnan çığıp, böten respublika ministrları diärlek şuşı karting klubnı açırğa cıynaldı. Bu da sport. İnde, böten respublika sport belän cenlänä. Tatarstanda däwlät küläm itibar birelä. Mädäniätkä dä, şuşındıy mönäsäbät bulsa ide, bu iş östenä quş qına bulır ide dip söylilär tatar millätçeläre bu uñaydan. Rusiä dä monı kürä. Menä Rusiäneñ sport öçen cawalı türäse Veçeslav Fetisov tağın Qazanğa kilde. Ul yartı yılğa ber kilep tora. Bu yulı, respublika belän federal üzäk sport buyınça kileşü tözede. Fetisov belän premyer Minnixanov imzaladı anı. Kileşü ni xaqında. Bik ğadi. Respublikada sportnı üsterü. Mäskäw, töbäklärgä sportnı üsterer öçen beraz aqça tamızaçaq.
Mäskäw digäne şartı räweştä inde. Ul şul uq Tatarstannan salım bulıp kitkän aqçanı ğına, wäqär räweştä, menä bez biräbez digän kebegräk qaytara. Älbättä, kitkän belän qaytqan ayırması zur. Kitä millionnar, qayta tiennär. Respublika anısı, älegä qädär Mäskäwsez dä sportnı üsterep kilde.
Räfis Cämdixan.
