Accessibility links

Кайнар хәбәр

İmgätelgän miting, imgängän xalıq


27 aprildä Ufanıñ Lenin isemendäge mäydanında ütärgä tieşle mitingqa anı oyıştıruçılarğa qarağanda özärgä niätläwçelär nığraq äzerlängän bulıp çıqtı. Xakimiät ämere buyınça militsiä xezmätkärläre oppozitsiäneñ xalıqnı mitingqa öndägän gäzitlären taratuçılar qulınnan tartıp alu faktları massovıy tös aldı. Ufağa kerüçe avtomobil yulları maxsus küzätü astına alındı. Bigräk tä Qazan – Ufa trassası aşa Ufağa kerüçelärneñ maşinaları centekläp tentelde. Bu xällär äle dä däwam itä.

Miting başlanırğa berniçä kön qala çit ölkälärdän Ufağa 1300 OMON suğışçısınıñ häm militsiä xezmätkärläreneñ kiterelüe mäğlüm buldı.

27 aprildä, miting başlanırğa 6 säğät çaması qalğanda FSB xezmätkärläre ber ük waqıtta Başqortstannıñ berläşkän oppozitsiäse ştabın, miting ütkärergä ğariza birgän BR kommunistları ofisın häm “Площадь восстания” gäziten näşer qıluçı bilgele jurnalist Viktor Şmakovnıñ fatırın basıp aldılar. Bu urınnarda tentülär ütkärgännän soñ BR oppozitsiäse liderı Ramil Bignovnı, BR tatarları milli-mädäni moxtäriäte räise urınbasarı, oppozitsion “Xalıq ixtıärı – “Воля народа ” gäzite möxärrire Mäcit Xucinnı, berläşkän oppozitsiä wäkile, fermer Xäsän İdiätullinnı FSB binasına soraw alunı däwam itärgä alıp kittelär. Şundıy uq çaralar Viktor Şmakovqa häm oppozitsion başqort xäräkäte liderı Ayrat Dilmöxämätovqa qarata da kürelgän.

Barlıq tentü yasalğan urınnardağı komp'yuterlar FSBçılar qulına küçkän.

Şuşı xällärgä qaramastan, oppozitsiäneñ irektä qalğan citäkçeläre mitingnı ütkärergä tırıştılar. Şunısı da iğtibarğa layıq: miting ütärgä tieşle mäydan böten perimetrı buyınça timer kirtälär häm militstiänerlar belän uratıp alınğan bulıp çıqtı. Mitingqa kilüçelär etlärdän isnätelgännän häm timer sizgeç qorılmalar belän tikşerelgännän soñ ğına maxsus koridor aşa mäydanğa ütä aldılar. Bu xällärne kürgän baytaq keşe kire borılıp kitte. Şulay da 500 keşedän torğan miting ütte. Çığış yasawçılar bu xällärne xakimiätlärneñ respublika grajdannarın mısqıl itü dip bähaladılar. Miting BR prezidentı Mortaza Räximovnıñ urınınnan kitüen taläp itkän rezolyutsiä qabul itü belän tämamlandı.

Kärim Yauış, Ufa.

XS
SM
MD
LG