Başqortstanda 29 aprel' könne qulğa alınğan tanılğan jurnalist, “Provinsial'nıye vesti” isemle bäysez gäzitneñ baş möxärrire Viktor Şmakov pänceşämbe könne kiç belän irekkä çığarıldı. Öç atna däwamında Ufadağı ber tikşerü bülegendä saq astında utırdı Viktor Şmakov. Anıñ qulğa alınuın respublika xoquq saqlaw oyışmaları üz gäzitendä ekstremistik mäqälälär bastıruı belän añlatqan ide. Yänäse, Viktor Şmakov “Provinsial'nıye vesti” gäziteneñ “Ploşçad' vosstaniä” quşımtasında xakimiätlärgä qarşı köç qullanırğa, alarnı wazifalarınnan töşerergä çaqırğan yazmalar bastırğan ikän.
Viktor Şmakov qulğa alınğaç ta, Ufada anı yaqlap, anı törmädän çığarunı taläp itep, törle çaralar, şul isäptän FSB – Federal' iminlek xezmäteneñ Başqortstan bülege binası qarşında piket ta oyıştırdılar. Qısqası, bäysez jurnalistnı qulğa alu respublikada şaqtıy zur rezonans tudırdı. Viktor Şmakovnıñ azat itü öçen, advokatlar bu eşne Başqortstan Yuğarı mäxkämäsenä dä tapşırdı häm Yuğarı mäxkämäneñ 16 may könne ütkän utırışı Viktor Şmakovnı qulğa alu döres tügel dip qarar çığardı. Şulay itep anı tikşerü barğan çorda irektä qaldıru taläbe qänäğätländerelde.
Ämma xoquq saqlaw oyışmaları bäysez jurnalistnı irekkä çığarırğa aşıqmadı. Barı ike kön ütkäç, atnakiç könne kiçen genä, Ufada şuşı könne oyıştırılğan uram cıyını tämamlanğaç qına, çığardılar anı. Şmakov äfände belän “Azatlıq” xäbärçesenä comğa könne telefonnan söyläşü forsatı çıqtı. Viktor Şmakov üzeneñ käyefe yaxşı buluın äytep, xäzer prokuraturağa Butırkin digän tikşerüçe belän oçraşuğa barırğa cıyınuın belderde:
Äle min prokuraturağa tikşerüçe belän oçraşuğa baram. Ul möğayın da “podpiska o nevıezde” iğlan itär. Min aldağı könnärdä advokatım belän eşçänlek alıp barırğa cıyınam. Bez minem ğäyeple bulmawımnı isbat itäçäkbez. Miña tağılğan ğayıplär cinayät kodeksındağı maddälärgä turı kilmi.Ufadağı tanılğan jurnalist, bäysez “Provinsial'nıye vesti” gäzite möxärrire Viktor Şmakov buldı bu. Aldağı könnärdä Viktor Şmakov üzeneñ advokatı belän eş alıp baraçağın äytte. “Min üzemneñ ğäyepsez tügellegemne isbat itü öçen eşçänlek cäyelderäçäkmen, - di Şmakov äfände. – Rusiä qanunnarı Başqortstanda da ütälergä tieş häm bez moña ireşäçäkbez”.
Viktor Şmakov üzeneñ kiläçäkkä uy-niätläre belän urtaqlaşıp tağın ber başlanğıçı xaqında äytte. “Min üzemneñ fikerdäş duslar belän Başqortstanda Bäysez jurnalistlarnı yaqlaw häm alarğa matdi yärdäm kürsätü fondı oyıştıraçaqmın, - di Şmakov äfände. – Şunsız Başqortstan şartlarında süz iregen yaqlawğa ireşep häm säyäsi basımğa qarşı köräşep bulmıy”.
