Bagdad. Bügen Ğiraq parlamentı ilneñ yaña xökümäten rasladı, häm anıñ äğzaları şunnan soñ üz wazifaların namuslı ütäw antın kiterde. Premyer-ministr Nuri Kamal äl-Mäliki başta mäcles deputatlarına xökümätkä keräçäk 37 keşeneñ isemnären uqıp çıqtı, alar arasında irlär genä tügel, xatınnar da bar. Şunnan soñ ministrlarnıñ härberse öçen tawış birelde. Şığıy ğäräplärdän täqdim itelgän premyer äl-Mäliki üze waqıtlıça eçke eşlär ministrlığına da citäkçelek itäçäk. Tışqı eşlär ministrı bulıp elek tä bu eşene alıp barğan körd Xuşyar Zebari qala, neft ministrı itep şığıy Xösäyen äl-Şäxristani bilgelänä. Sönni ğäräplärdän saqlanu ministrı wazifaların waqıtlıça başqaruçı itep Säläm äl-Zäwbaği raslana. Ul şulay uq premyer-ministr urınbasarı da bulaçaq. Eçke eşlär häm saqlanu kebek qüät ministrların älegä waqıtılıça ğına bilgeläwgä qarşılıq yözennän qayber sönni deputatlar utırışlar zalınnan çığıp kitte. Ğiraq xökümäteneñ kemnärdän toruı xaqında ilneñ törle dini wä milli mäxälläläre arasında kileşü eşe 5 ayğa süzıldı. Premyer-ministr äl-Mäliki, xäzer xökümätneñ töp burıçı bulıp ildä totrıqlılıq wä iminlekne nığıtu toraçaq, dip belderä.
