Äfğänstandağı AQŞ xärbiläre, uzğan ber atnada 300-dän artıq keşeneñ ülemenä kitergän qatı bäreleşlärdän soñ Taliban ğisyançılarınıñ köçe häm tä'sire arttı dip belderä.
Bügen üzäktäge Ğor wiläyätendä Taliban köçläre dip şiklänelgän törkem ber xäkimne, tağın ber räsmine häm 2 tän saqçısın üterde. Sişämbe könne könyaqtağı Uruzgan wiläyätendäge bäreleştä Taliban suğışçısı dip şiklänelgän 60-lap keşe häm 4 soldat hälak buldı.
Bügen Qabulda prezident Xämit Qarzai Äfğänstandağı AQŞ citäkçelegendäge köçlär başlığı, general leytenant Karl Eikenberry belän oçraşıp bu atnada bulğan hawa höcümendä tınıç xalıqnıñ ülüenä añlatma birüne taläp itte.
Qarzai Kandahar wiläyätendä bulğan bu hawa höcümen tikşerergä quştı. AQŞ xärbiläre anda tögäl tiüçe ut açıldı dip belderä.
Xökümät äytüençä, ul hawa höcümendä kimendä 16 sivil hälak bulğan, Äfğänstandağı töp keşe xoquqları yaqlawçı oyışma tınıç xalıq arasında qorbannar sanı 30ğa citärgä mömkin di.
