Accessibility links

Tatar kongressı başqarma komitetı utırışı ütte


Comğa könne Ufada Başqortstan Tatar Kongressı Başqarma komitetınıñ çirattağı utırışı bulıp ütte. Törle säbäplär belän moñarçı anıñ bu utırışı kiçekterelä kilgän ide. Xäzer inde cäyge yallarğa kitär aldınnan, milli oyışma äğzaları cıyılıp kiñäş qorıp alırğa kileşte.

Başqortstan Tatar kongressı Başqarma komitetınıñ bu utırışı älege oyışma öçen alınğan yaña eş urınında ütte. Şähär üzägendäge binadan Kongress idaräse öçen ike bülmä alğannar ide. Anda berniçä ay buyı tözekländerü eşläre bardı. Eşneñ ozaqqa suzıluı älege dä bayağı aqça bulmawğa bäyle. Xäzer inde biredä daimi eşläyäçäk keşelär öçen häm millättäşlärne qabul itärgä mömkinleklär tudırılğan.

Başqortstan Tatar kongressı Başqarma komitetı utırışın anıñ räise, professor Ruşan Ğällämov açtı häm alıp bardı. Üzeneñ kereş süzendä ul uzğan aylar eçendä başqarılğan qayber eşlärgä tuqtaldı. Bilgelängän hämmä eşlärneñ dä tormışqa aşırılmawına köyeneçen dä belderde ul. “Başqortstan Tatar kongressı eşçänlege respublikada yäşäwçe tatarlarnıñ milli-mädäni ixtiacların qänäğätländerü yünäleşendä baytaq eşlär başqarırğa sälätle, - di Ruşan äfände. – Ämma bezneñ küp kenä başlanğıçlarıbızğa xakimiätlär yağınnan bitaraflıq, ä qaysıberdä açıqtan-açıq qarşılıq kürsätü bar. Añlaşıp, kiñäşläşep eşlärgä telibez dä, läkin,küräseñ, bezneñ taläplär kemnärgäder oşap ta betmider”.

Ruşan Ğällämov äytüençä, Kongress Başqarma komitetınıñ älege äğzaların respublika citäkçelege yağınnan tanımaw küreneşe bar. “Şäxsän minem belän dä isäpläşmäskä tırışu ğälämäte bar, - di Ruşan äfände. – Küräseñ xakimiätlärneñ minem urında başqa keşene, yäğni üzlärenä yarağan, “kesä” keşesen küräseläre kiläder inde”.

Şuşı xälneñ ğomum eşkä dä tiskäre yoğıntı yasawın bilgeläde Ruşan Ğällämov. Soñğı waqıtta Kongressnıñ rayonnardağı häm şähärlärdäge bülekläre eşçänlege dä şaqtıy sürelde. Monısında inde ul üzeneñ dä, Başqarma komitet äğzalarınıñ da ğayıbe barlığın tanıdı.

Fiker alışularda häm kön üzägendäge başqa mäs’älälärne tikşerüdä Başqarma komitetnıñ başqa äğzaları da qatnaştı. Kongressnıñ Salawat şähäre bülege räise Äsğät'' Qormanaev üz çığışında ğomum Kongress eşçänlegenä tiskäre bäya birde. Anıñ süzlärençä, soñğı yartı yılda Tatar kongressı Başqarma komitetı wäkilläre ğafu itelmäslek sülpänlek kürsätte häm älläni igelekle eşlär qıla almadı. “Şulay da urınnardağı qayber filiallar, bernärsägä qaramıy, uñışlı ğına eş alıp bardı, küp çaralar oyıştırdı”, - di Äsğät'' Qormanaev. Eşlär uñışlı barsın öçen Qor’än quşqança yäşärgä häm eşlärgä kiräk, digän fikeren dä äytte ul:

Çın döresen genä äytkändä bezneñ Kongress yün''läp eşlämäde disäñ dä bula. Älbättä, urınnardağı büleklär möstäkıyl'' räweştä cimeşle genä eşläde. Kemder sülpän eşläsä, kemder cähäträk eşläde. Eşlärebezne canlandırırğa kiräk. Eş barsın disäñ här byuro äğzası Qor’än quşqança yäşärgä häm eşlärgä tieş dip sanıym.

Başqortstan Tatar kongressı Başqarma komitetı äğzası, Kongressnıñ Salawat şähäre bülege räise Äsğät Qormanaev fikerlären işettegez. Başqortstan Tatar kongressınıñ Salawat şähäre bülege wäkilläre üz eşläre belän maqtana ala. Alar şähärdä tatar telendä “Salawat tañnarı” isemle gäzit çığara başladı. Mäktäplärdäge tatar balaları öçen ädäbi kitaplar häm däresleklär alıp birüdä dä zur yärdäm kürsätte, bixisap mädäni çaralar da oyıştırdı bu filial. Şuña da Kongress Başqarma komitetı utırışında anı başqalarğa ürnäk itep quydılar.

Utırışta Başqortstan şartlarında tatar xalqı mänfägat''lären yaqlap eş alıp barunıñ qıyın buluı xaqındağı fikerlär dä küp çığışlarda yañğıradı. Räsmi xakimiätlär üzläre qaramağındağı milli oyışmalarğa ğına finanslar bülä häm barı tik alar belän genä isäpläşä, digän süzlär yış yañğırıy başlağaç, Başqarma komitetnıñ qayber äğzaları “zarlanıp utırudan fayda yuq, üzebezneñ quldan kilgänne genä eşlägän oçraqta da, bez küp kenä igelekle ğämällär qıla alabız” dip qarşı töşte.

Utırış barışında Kongressnıñ aldağı aylarğa burıçları xaqında da fiker alışu buldı. Misal öçen, iyün ayında Başqortstan tatar cämäğätçelek oyışmaları respublikada tatar mäğärifen saqlap qaluğa bağışlanğan zur kiñäşmä ütkärergä cıyına. Anda Kongress wäkilläre dä qatnaşaçaq häm tatar mäktäplären başqortlaştıru protsessı xaqında mäğlümatlar belän çığış yasayaçaq, dip äytelde.

Kiñäşmädä Ufa “Nur” tatar däwlät teatrı tiräsendä kilep tuğan kierenke xällär dä tikşerelde. Mäğlüm buluınça, “Nur” teatrı binasınıñ zur zalın faydalanuğa tapşıru haman kiçekterelä kilä. Xäzer inde ul tözelep betmäs borın işelä dä başlağan. Teatrnıñ direktorı Ural Ğirfatullinnıñ eşennän qänäğät bulmawçı artistlar eştän dä kitä başlağan. “Nur” teatrındağı xällärne tikşerü öçen, BR Mädäniät ministrlığı citäkçeläre belän bergäläp, tatar cämäğätçelek oyışmaları maxsus oçraşu oyıştırırğa tieş digän qarar qabul itelde utırış azağında.

XS
SM
MD
LG