Accessibility links

Кайнар хәбәр

Omski ölkäsendä sabantuylar bulamı?


Mäğlüm bulğança, Omskida ölkä külämendä Saban tuyı bıyıl bulmayaçaq. Çönki milli bäyrämebez ölkäneñ mädäniät ministrlığı qararı belän “Yedinenie” milli mädäniätlär festivale qısalarında 2 yılğa ber tapqır ğına ütkärelä. Aldağı yılda Saban tuyın Tevriz rayonında ütkärü qaralğan. Bu şulay da bıyıl bäyräm bötenläy bulmıy digän süz tügel. Omski ölkäseneñ tatarlar iñ küpläp yäşägän Ust'-İşem rayonında mäsälän, Saban tuyı här yılnı rayon külämendä uzdırılıp kilä. Äytergä kiräk, biredä bäyrämne daimi oyıştıru asılda rayon xakimiäteneñ mädäniät bülege mödire, millättäşebez Ruzaliä Bekturganovanıñ tırışlığınnan tora. Bıyıl Sabantuy bäyräme tağı ölkäneñ ike tatar awılında – Bol'şereç'ye rayonınıñ Ülänkül häm Tara rayonınıñ İşäy awıllarında bulaçaq. Bu awıllarda bäyräm awıl xakimiätläre başlıqları häm cirle tatar oyışmaları tırışlığı belän oyıştırıla. Awıl Saban tuylarına ğädättägeçä ölkä üzägennän dä, yaqın-tirä awıllardan da qunaqlar kilä. Ülänkül awılına bäyrämdä qatnaşırğa Omskidan “Umırzaya” ansamble baraçaq.

Omski ölkäsendä soñğı yıllarda iyün ayında tağı ber çara – xäter köne ütkärü ber izge yolağa äwerelep bara. Bol'şereç'ye rayonınıñ Yalankül awılında älege çara inde öçençe yıl rättän ütkärelä. Yalanküllelärdän ürnäk alıp xäter könen bıyıl şuşı uq rayonnıñ Çernalı, Qaraqül, Quşkül, Tosqazan, Ülänkül awıllarında da ütkärergä cıyınalar.

Omskinıñ “Duslıq yortı” çaraları

İnde xäbär itkänebezçä, Omskida milli oyışmalar eşçänlege däwlät tarafınnan finanslanmıy. Döres, aldan qaralğan programma buyınça “Duslıq yortı” belän berlektä eşlängän ayırım çaralar ütkärüdä berniqädär yärdäm kürsätelä. Ämma kötelmägän üzgäreşlär dä bulmıy qalmıy. Qayber şundıy üzgäreşlär turında sorawlar çärşämbe könne “Duslıq yortı”nda ütkän kiñäşmä-utırışta qaraldı. Anda milli oyışmalar citäkçeläre çaqırılğan ide. Eş plannarında barlıqqa kilgän üzgäreşlär belän alarnı “Duslıq yortı” direktorı Natal'ya Stepanova tanıştırdı – regionara yäşlär festivaleneñ 2007 yılğa, tatar-başqort mädäniäte könnäreneñ sentäber ayına küçerelüe turında belderde. Annan soñ Stepanova iyün ayında eşlärneñ bik tığız buluı, ölkädä küp çaralar ütäçäge turında bäyän itte.

“Duslıq yortı” direktorı bulaçaq çaralarnıñ küpçelege milli oyışmalar qatnaşında ütäçäge turında assızıqladı.

Döres, milli oyışmalar qayber çaralarğa fon öçen, milli kiemnärdä tirä-yaqnı bizäp toru öçen genä çaqırılalar kebek. Şulay da küp oçraqta üz mädäniätlären cır, biyü, kürgäzmälär aşa kürsätü mömkinlege dä bula. Mäsälän, 8 iyündä eşli başlayaçaq “Seber xalıq soborı”nıñ 8-nçe qorıltayına kilüçe qunaqlarnı çara ütäçäk yäşlär mädäniät üzägendä törle milli oyışmalarnıñ yäşläre milli kiemnärdä qarşı alaçaqlar. 12 iyündä Rusiä könendä ölkä xakimiäte qarşısındağı sport qırında şähärdä eşläp kilüçe milli üzeşçän sänğät kollektivlarınıñ kümäk çığışları bulaçaq, ä inde här milli kollektiv üz xalqınıñ mädäniäten ayırım mäydannarda kürsätä alaçaq, yäğni qul eşläre, milli kiemnär, yort-cir äyberläre quyılğan kürgäzmälär yanında keçkenä konsert oyıştıraçaq. Bu küreneştä tatar oyışmalarınnan “Umırzaya” häm “Ömet” kollektivları - cämğısı 22 keşe qatnaşa. Tatar kollektivları iyün ayında “Duslıq yortı” oyıştırğan tağı ber çarada – İsil'kül rayonında ütkäreläçäk çiktäş territoriälär festivalendä qatnaşaçaqlar.

Şulay itep, milli oyışmalar, şul isäptän tatarlar da, cäy buyına waqıtların, köçlären “Duslıq yortı” tarafınnan oyıştırılğan kürsätmä çaralarda qatnaşuğa yünältäçäklär.

Rozaliä Sayganova, Omski

XS
SM
MD
LG