Yevropa Berlegeneñ tışqı säyäsäte başlığı Javier Solananıñ İranğa täqdim itkän çaralar planına, İrannıñ baş atom aradaşçısı Ali Laricani, uñay qaraş belderde, ämma "qayber qarşılıqlarnı beterergä kiräk" dide. Uzğan atnada bu täqdimnärne BMO İminlek Şurasınıñ 5 daimi äğzase – Britaniä, Qıtay, Fransiä, Rusiä häm AQŞ, şulay uq Germaniä diplomatları äzerlägän ide. Planda – İran uran bayıtunı tuqtatqan oçraqta – törle yaqlı täqdimnär, tuqtatmasa – cäzalar häm xalıqara taläplär yazılğan.
