Bügen Bağdadnıñ şığıylar mäçetendä comğa namazı waqıtında ber intixarçı bomba şartlatıp kimendä 10 keşene üterde, distälärçä keşene yaraladı. Näq şul uq mäçettä aprel ayında intixarçı şartlatuçılar 90 keşene ütergän ide.
Kiçä BMO İminlek Şurasında Ğiraq tışqı eşlär ministrı Xöşyär Zebari Ğiraqta köç qullanunı kimetü öçen Ğiraq häm xalıqara köçlär arasında xezmättäşlek däwam itärgä tieş dip äytte.
"Şuña kürä Ğiraq xökümäte xalıqara köçlärneñ bezneñ ildä toruın sorıy häm monı xuplıy. Häm bez bu köçlärneñ häm koalitsiä illäreneñ Ğiraq xalqına yardäm kürsätügä birelgänlege öçen räxmät belderäbez" dide Zebari.
Zebarinıñ älege çığışınnan soñ İminlek Şurası AQŞ citäkçelegendäge köçlärgä Ğiraqta kimendä bu yıl axırına qädär qalırğa wäkalät birde. Ämma elegräk Ğiraqtan 600-läp xärbien dikäber urtalarında çığarırğa cıyınğan Yaponiä üz xärbiläreneñ annan irtäräk kitärgä mömkinlegen belderde.
