Accessibility links

Tatarstannıñ Uraldağı daimi wäkillegendä zur fänni simpozíum uzdı


Yekaterinburg şähärendä Tatarstannıñ Uraldağı daimi wäkillege eşli başlawğa un yıl tuluğa bağışlanğan çaralar däwam itä. Bu könnärdä daimi wäkillek binasında “Tatarstan-Ural: humanitar xezmättäşlek täcribäse häm strategiase” dip atalğan dissiplinaara sipozíum bulıp uzdı. Simpozíum Tatarstannıñ Uraldağı daimi wäkillege, Rusiä fännär akademiaseneñ Ural bülegenä qarağan tarix häm arxeologia institutı häm Tatarstan fännär akademiaseneñ Märcäni isemendäge tarix institutı tarafınnan oyıştırıldı.

Biredä Yekaterinburg, Qazan, Çiläbe şähärlärennän kilgän kürenekle zur ğälimnär, säyäsätçelär, däwlät häm cämäğät eşlekleläre qatnaştı. Simpozíum açıq dialoğ räweşendä uzdı. Qatnaşuçılar tarafınnan töbäqärä xezmättäşlek nigezendä Rusiädä federalizm üseşe üzençälekläre, etnik törkemnär arasındağı mönäsäbätlär, İdel-Ural kiñlegendäge tatar xalqınıñ etnik häm mädäni üseşe kebek aktual' mäsälälär qaraldı. Çığış yasawçılarnıñ kübese töbäqärä humanitar xezmättäşlekneñ strategik proektına zur ähämiät birdelär. Alar fikerençä, qurqınıçsızlıqnı saqlaw häm sosial' kierenkelekne buldırmaw kebek ictimağıy ähämiätkä iä bulğan mäsälälärdä töbäqärä humanitar xezmättäşlekne üsterü, bu eştä töbäklärneñ häm Üzäkneñ pozitiv faktorların qullanu bik möhim. Häm, hiçşiksez, ğälimnär häm säyäsätçelär ber süzdä bulıp, bergäläp eşlärgä tieş. Tıñlawçılarnıñ iğtibarın ictimağıy üseştä Tatarstan häm Ural xalqınıñ etnokulturalı potensialın qullanuğa yünältüçelär dä buldı. Mäskäw şähärennän kilgän kürenekle ğälim, tarix fännäre doktorı, professor, Tatarstan fännär akademiaseneñ poçetlı akademigı Äğdäs Xösäyen ulı Borhanov, “Tatar milläteneñ bügenge xäle häm kiläçäge” dip atalğan çığışında, Tatarstan respublikasınıñ töbäklärdäge daimi wäkillekläreneñ töp wazífası tatar milläten saqlap qalu dip belderde. Töbäqärä xezmättäşlekne nığıtu buyınça başqarılğan eşlärneñ barısı da şuşı aktual' mäsälägä qaytıp qalırğa tieş, dide ul.

Simpozíumda etnikara mönäsäbätlär qontekstında Ural tatarlarınıñ borınğı taríxın häm mädäni qazanışların nıqlabraq öyränergä kiräk digän qarar qabul itelde. Älege tikşerenülärne ike töbäkneñ dä tarix institutları tarafınnan uzdırırğa kiräk digän täqdim kertelde.

Açıqtan-açıq dialoğ waqıtında bik kiräkle häm qızıqlı fikerlär yañğıradı.Tatarstannıñ Uraldağı daimi wäkile Rawil Bikbov fikerençä, alarnı sistemağa salıp, ğämälgä kertü öçen äle eş küp. Rawil Bikbov simpozíum ike töbäk arasındağı bäyläneşlärne üsterüneñ yaña yünäleşlären bilgeläp, bik faydalı uzdı dip belderde.
XS
SM
MD
LG