Başqortstan yuğarı uqu yortlarında kerü imtixannarı iñ qızu çorına citä. Bu könnärdä Ufadağı yuğarı uqu yortlarında da üz bäxeten sınawçılar bixisap. Qayber belgeçleklärgä ber urınğa 10-15 är abiturient turı kilä. Haman da yurist, ekonomist, menedjment hönärläre buyınça belem alırğa tezläwçelärneñ küp buluı mäğlüm.
Yuğarı uqu yortlarına kerü imtixannarı däwamında yıl sayın rişwät aluçılar sanı da arta. Abiturientlarnıñ ata-anaları aqçasına tiz genä bayırğa omtıluçılarnıñ çirattağı ber törkemen Başqortstannıñ iñ däräcäle uqu yortı sanalğan Başqortstan däwlät universitetında faş ittelär. Anda xoquq fakul'tetına kerergä telägän abiturientnıñ ata-anasınnan 200 meñ sum külämendä rişwät aluda ğäyeplänep, biş keşe qulğa alındı. Alar arasında qabul itü komissiäse äğzası da, möğallimnär dä, aradaşçı xatın-qız da bar. Xoquq saqlaw oyışmaları wäkilläre fikerençä, bu älege törkem äğzalarınıñ berençe rişwät alu oçrağı ğına bulmağan. Xäzer rişwätçelär östennän mäxkämä eşe açılğan.
Başqortstan yuğarı uqu yortlarında aqçağa uqırğa kertü oçraqları bik küp. Ämma belgeçlär fikerençä, küpçelek rişwätçelär bik osta eş itä häm xoquq saqlawçılar yätmäsenä eläkmi qala.
