“Agora” assotsiatsiäse advokatı Rämil Äxmätgalievqa Totsk xärbi prokuraturası cinayät eşe materialların kürsätergä telämäde. Çönki Totsk xoquqçıları Qazan yegete Radik Xäbirovnı zıyan kürüçe itep sanamıy. Ämma advokat Rämil Äxmätgaliev äytüençä, cinayät eşe açılu belän Radik zıyan kürüçe xoquqlarına iä buldı.
Niçek kenä bulmasın, Totsk xärbi prokuraturası imgätelgän Qazan yegete eşe turındağı materiallarnıñ qayberlären advokatqa täqdim itkän. Qayberlären, çönki alarnıñ ber öleşe şul waqıtta Samarada tikşerelgän bulğan. Rämil Äxmätgaliev mäxkämä tarafınnan ütkärelgän meditsina ekspertizası dokumentları belän tanışa alğan. Alarnıñ näticäläre şaqqatıra torğan. Keçe serjant Radik Xäbirov eşendä Totsk prokuraturası Qazan mediklarınnan şiklänä. Bu xaqta “Kommersant” gäzite yazdı. Xezmät itü waqıtında Radik üz üzen üterergä mataşqan dip bara xärbilär. Tikşerüçelärneñ xezmätkä alınu komissiäse yegetne psixik yaqtan sälämät bulmağan kileş armiägä cibärgän digän şige bar. Şuña kürä Qazannıñ xärbi bülege eşçänlege dä tikşereläçäk. Advokat Rämil Äxmätgaliev söyli:
Totsk xärbi prokuraturası tikşerüçese xärbi komissariat eşçänlege mäs’äläsen kütärde. Ämma Aviatözeleş rayonınıñ xärbi bülege xezmätkärläre Totsk xoquqçılarınıñ farazın kire qaqtı. Xärbi xezmätkä cibärelgändä Radik sälämät bulğan. Monnan tış yegetneñ sälämätlegen tağın berniçä qat tikşergännär, şul isäptä Saratovtağı uqular waqıtında da. Yegetneñ sälämätlege bernindi sorawlar tudırmağan. Şul uq waqıtta Totsk prokuraturasında uzğan yılnıñ dekaberendä Radik Xäbirov xärbi xezmätkä iäläşüe bozılu säbäple xastaxanägä yatqırılğan dip belderälär. Meditsina belgeçläre äytüençä, iäläşü törle keşedä bozılırğa mömkin, ul xätta tormışınıñ axırına qädär saqlanğan oçraqlar bar. Küp keşedä küzgä kürenmägän psixik awırular bar. Häm däwlätneñ maqsatı - psixik awırularnıñ älege formaların da waqıtında tabu. Ämma bu Rusiäneñ bügenge xärbi çaqıru şartlarında mömkin tügel.
Advokat Rämil Äxmätgaliev äytüençä, xärbilär daimi räweştä Radiknıñ psixik yaqtan sälämät bulmawın äytep kilä. Mondıy belderülärne Rusiäneñ saqlanu ministrlığı wäkilläre medik ekspertiza näticäläre bilgele bulğanğa qädär yasıy. Totsk diviziäse citäkçeseneñ xoquq eşe buyınça yärdämçese Sergey Polovinko Radik Xäbirov eşendä cinayät yuq dip beldergän häm ul cinayät eşe quzğatunı kire qağarğa kiräk dip sanıy.
Al'bina Zäynulla
