Accessibility links

Кайнар хәбәр

Ğazada urlanğan jurnalistlar irekkä çıqtı


Amerikanıñ Fox News televidenie çeltärendä eşlägän 2 jurnalist, 2 atnağa yaqın totılğannan soñ, irekkä çıqtı. Xäbärçelärneñ azat itelüenä berniçä säğät qala, urlawçılar, videotasmağa yazılğan belderüne tarattı. Anda jurnalistlar islam qabul itek dip äytä. Soñınnan, xäbärçelär bu belderüne qoral töbälgän kileş yasarğa mäcbür iteldek, didelär. Jurnalistlar urlawçılarnıñ alarğa mönäsäbäte naçar buldı, dip äyttelär. İrekkä çıqqan soñ, Centanni häm Wiig Hamas wäkile İsmail Hanyieh belän oçraştı. Ul urlaçılarnıñ “Al-Qayda”dan bulmağanın ğına äytte. İrekkä çığudan soñ ütkärelgän berençe matbuğat oçraşuında Steve Centanni bolay dide. “Bezneñ belän bulğan xäl başqa jurnalistlarnı qurqıtmas, dip ometlänäm. Fälästinlelär bik äybät, kiñ küñelle keşelär. Dönya alar turında kübräk belergä tieş, Qurımagız. Gazağa kilegez häm alar turında yazığız. Min monda buluıma bäxetle häm barığızğa da yärdäm öçen räxmät.”, -dide Steve Centanni. Amerikan Steve Centanni häm Yaña Zelandiädän Olaf Wiig Gazada 14nçe avgustta urlanğan ide. Alarnı moña qädär bilgele bulmağan İzge Cihad törkeme urlıy. Şuşı törkem, Amerika, mösleman totqınnarnı irekkä çığarsın, digän taläp quyğan ide. Ütkän töndä Gazada, İzrail hawa köçläreneñ jurnalsitlar maşinasına bulğan höcüme näticäsendä 2 Hamas suğışçısı üterelde häm berniçä tsivil keşe, şul isäptän 2 jurnalist yaralındı. Alar - Reuter agentlığı teleoperatorı häm ğäräp gäzite xäbärçese ide. İzrail xärbiläre Reuter ağentlığı maşinası xärbi çaralar barğan cirdä şikle itep yöri ide, dip belderde.
XS
SM
MD
LG