Accessibility links

Кайнар хәбәр

Pensionerlar firqäse Bignovqa qarşı


5 sentäbr Rusiä pensionerlar firqäseneñ Başqortstan bülekçäse Rämil Bignov utırğan respublika tatarları milli-mädäni möxtäriäte binası yanında qarşılıq aksiäse ütkärde. Alar Bignovtan “Xalıq” investitsiä-çek fondına salğan vauçerları öçen tüläw taläp itte. Qullarda “Bignov, urlağan aqçalarnı qaytar!”, “Rämil Bignov - başqort Mavrodie!” häm başqa şundıy eçtälekle şiğarlär kürergä bula ide. Çarada iñ qızu çığışnı firqa räise Aleksandr Sidyakin yasadı. Ul Bignovnı oliğarx, kapitalist dip belderde, xalıq aqçası tuplanğan “Başekonombank”nı 400 million dollarğa satıp respublikadan qaçarğa äzerlänä dide.

Möxtäriät ixatasına çarağa äzerlänep berläşkän oppozitsiä üz şiğarlären elgän ide. Anda SSSR däwlät banklarında yanğan aqçanı qaytaru, respublika citäkçelegennän yağulıq-energetika tarmağın qaytarunı taläp itkän şiğarlär bar ide. İxatada şulay uq elegräk elgän tatar gimnaziäsen cimerügä qarşı şiğarlär dä bar ide. Alar arasında tuğan tel uqu buyınça konstitutsiä xoquqı, Rusiä Prezidentınıñ tuğan telne uquğa qarşılıqlar bulırğa tieş tügellege turında süzläre kiterelgän şiğarlär dä bar ide.

Çarağa kilgän ber törkem başqort yäşläre möxtäriät ixatasına bärep kerep älege şiğarlärne yırtıp bärdelär. Milli-mädäni möxtäriät räise urınbasarı Mäcit Xucin militsiägä närsä qarıysız dip qıçqırğannan soñ ğına alar berniçä yegetne qulğa alıp maşinağa utırtıp alıp kitte. Çaranı oyıştıruçılar Bignovqa çeregän yomırqa häm pomidorlar ırğıtu teläge belän yansa da, ul binadan çıqmadı. Şulay da alarnı möxtäriät ixatasına ırğıtıp beterdelär. Soñında cıyıluçılar Bignov qaraçqısın yandırdılar häm taraldılar. Qaraçqınıñ başı qabartılğan prezervativtan ğibärät ide.

6 sintäber berläşterelgän oppozitsiä utırışı buldı. Anda qatnaşuçılar tatar cämägätçelek oyışmasına başqort yäşläre bärep kerü millätara mönäsäbätlärne bozuğa alıp kilä dip belderdelär. Milli-mädäni möxtäriät bu uñaydan il prezidentına, Başqortstan häm Tatarstan başlarnına, iminlek xezmätenä, prokuraturağa möräcägätlär äzerläyäçäk.
XS
SM
MD
LG