Accessibility links

Кайнар хәбәр

200 yıllıq Qazan zooparkı bik awır xäldä


Qazan zooparkı bügen xätta qurqınıç xäldä. Şähärneñ başqarma komitetı citäkçese Marat Zahidullov monı üz küzläre belän kürgän. Citäkçelär xaywannar baqçasın qarap yöregän waqıtta, arıslan bik ciñel genä üz çitlegen cimerep taşlağan. Şulay uq bik naçar xäldä başqa cänleklärneñ torğan urını da. Zoopark citäkçeseneñ urınbasarı Ğuzäl Ğorbanewa äytüençä, zooparktağı barlıq xaywannıñ da çitlekläre normağa turı kilmi. Alar bik keçkenä häm bik iskergän.

Ämma moña ğacäplänese yuq. Qazan zooparkı 200 yıl elek tözelgän kileş tora. Anı tözekländerü öçen berniçä proyekt äzerlängän bulğan. Ämma xaywannar baqçasınıñ xälen yaxşırtu omtılışları hämmäse dä käğäzdä genä qalğan. Qazannıñ meñellığına äzerlek waqıtında zoopark tözekländerü obyektları isemlegenä kertelgän bulğan. Häm anı tözekländerügä 4mlrd sum aqça bülenep birelergä tieş bulğan. Tik bu yulı da xaywannar baqçasına yärdäm timägän. Ä ber yıldan zooparknıñ 200 yıllıq yubiley citä. Tik bu zur bäyrämne uzdırırlıq, xalıqara kiñäşmä ütkärerlek şartlar yuq. Zoopark xezmätkärläre citäkçelek isemenä bik küp xatlar yazdı. Mäskäw zooparkınıñ citäkçese Tatarstan prezidentına zooparknıñ ayanıçlı xäle turında xat yazğaç qına, xaywannar baqçasına räsmi delegatsiä ayaq bastı.

Sişämbe könne xaywannar baqçasınıñ xälen tikşerep çıqqan soñ, Qazannıñ başqarma komitetı citäkçese Marat Zahidullov zooparknı tözekländerergä wäğdä itte. Ul bu eşkä 2mln sum aqça bülenep biräçägen äytte, zooparknı tözekländerügä iğänäçelär häm investorlarnı cälep itäçägen belderde. Zoopark citäkçeseneñ urınbasarı Ğuzäl Ğorbanewa äytüençä, Qazan zooparkında bu eş beraz alıp barıla. Zooparkta üzlären iñ yaxşı toya - barslar. Çönki alarnıñ yazmışı öçen cawaplılıqnı “Aq bars” bankı alınğan. Barslar öçen yap-yaña çitlek alınğan häm bügenge köndä alar tulısınça banknıñ qaramağında dip äytergä bula. Ämma älegä şundıy bäxetle tormışta Qazannıñ xaywannar baqçasında barı tik barslar ğına yäşi. Qalğan xaywannar bik awır xäldä qalğan.

Ä bit Qazan zooparkı bik üzençälekle sanala. Bu baqçada xaywannar da, bik siräk oçrıy torğan üsemleklär dä tuplanğan. Zooparkta 152 tör cänlek yäşi. Alarnıñ 20gä yaqını Qızıl kitapqa kertelgän. Baqçada 900gä yaqın tör üsemlek bar. Alarnıñ kübese şulay uq siräk oçrıy torğan häm Qızıl kitapqa kergän.

Al'bina Zäynulla

XS
SM
MD
LG