Accessibility links

Başqortstan Respublika könen bilgelärgä äzerlänä


Başqortstan bu könnärdä bäyräm ruxında yäşi. 11 üktäber könne Başqortstan üzeneñ töp bäyrämen – Respublika könen bilgeli. Başqortstan Xökümätendä şuşı bäyräm çaraların ütkärügä äzerlekne tikşergän utırış bulıp ütte. Anı Xökümät räise urınbasarı BR mädäniät häm milli säyäsät ministrı İldus İlişev alıp bardı. Kiñäşmädä Respublika köne bäyrämeneñ töp çarası – Ufadağı tantanalı utırışnıñ 10 üktäber könne ütäçäge xaqında äytelde. Bäyrämdä tege yäki bu çaralarnı oyıştıru öçen cawaplı bulğan keşelär xisap tottı.

Bıyılğı Respublika könen bäyräm itügä bäyle barlıq tantanalar Başqortstannıñ Rusiägä quşıluına 450 yıl tulunı bäyräm itügä äzerlek ruxı belän suğarılaçaq. Xäyer, respublikada närsä genä eşlänsä dä, anı 450 yıllıq yubiley belän bäyläp söylilär, şuña bağışlana dip täqrarlıylar.

Bäyräm köne 11 üktäber bulsa da, aña bağışlanğan törle çaralar küpkä aldan başlandı. Respublika citäkçeläre bäyräm uñayınnan törlese törle rayonda yaña binalarnı, küperlärne häm başqa tözeleş ob'yektların faydalanuğa tapşıruda qatnaşa. Prezident Mortaza Räximov belän premyer-ministr Rafael' Baydäülätov soñğı könnärdä küp kenä rayonnarda bulıp, şaqtıy ğına yaña ob'yektlar açu tantanalarında qatnaştı.

Başqortstannıñ Üzallılıq turında Deklaratsiä qabul itüennän soñ bäyräm itelä başlağan Respublika köne xäzer inde ğädätkä kerde. Möstäqillek üze betsä dä, xakimiätlär anı kiläçäktä dä bäyräm itü yaqlı. Ğomumän, respublika citäkçeläre dä, başqort ğalimnäre häm başqort milli oyışmaları wäkilläre dä Başqortstannı Rusiäneñ ışanıçlı teräge, dip isäpli. Misal öçen, şuşı bäyräm aldınnan jurnalistlar belän oçraşuda tanılğan ğalim, akademik Fänil Fäyzullin Rusiäneñ federal' qorılışın buldıruda Başqortstan belän Tatarstan kebek qüätle respublikalarnı äydäwçe töbäklär dip sanıy.



Rusiäne federal' qorılış qına nığıta ala. Ä monıñ öçen iñ berençe çiratta Başqortstan häm Tatarstan kebek qüätle milli respublikalarğa tayanırğa kiräk. Elekke kebek Tatarstan belän Başqorsttan Rusiädän çığa digän süzlär fantastika bit ul. Alar Rusiä eçendä häm berqaya da çığarğa cıyınmıy. Alarğa kübräk üzallılıq qına birelsen. Bu isä federalizmnı nığıtaçaq. Ä Başqortstan öçen uzğan unaltı yıl küp närsä birde.

Tanılğan başqort ğalime, akademik Fänil Fäyzullin fikerlären işettegez. Äye, tizdän Başqortstan üzeneñ olı bäyrämen bilgeli. Anıñ qayber çaraları başlandı da inde. Atna azaqlarında oyıştırıluçı awıl xucalığı yärminkäläre dä şuşı bäyrämgä bağışlana, törle sport häm mädäni çaralar da anıñ uñayınnan oyıştırıla.

Äye, räsmi matbuğatta Başqortstan respublikası köne bäyrämenä zur iğtibar birelä. Xakimiät dairäläre bıyıl xalıqqa zur tantanalar, kiñ qolaçlı bäyräm çaraları wäğdä itä. Artistlarnı xätta küp aqçalar tüläp Mäskäwdän dä çaqıralar. Yevrovideniedä qatnaşıp şaqtıy uñışlı çığış yasağan Dima Bilan digän cırçını da kötä Başqortstan yäşläre.

XS
SM
MD
LG