Accessibility links

Кайнар хәбәр

Qazanda tüläwle aşığıç yärdäm kürsätelä


Aqçağa böten närsäne satıp alırlıq zamanada yäşibez dilär. Bügen teläsäñ, tüläwle aşığıç yärdäm maşinasın da çaqırtıp bula Qazanda. Älege maşina ör-yaña cihazlar, iñ zamança darular belän tä'min itelgän. Häm anda fel'dşer tügel, ä yuğarı belemle tabip yöri. Älege maşinalar bik awır xäldä bulğan keşelärne Tatarstanda ğına tügel, ä Rusiä buyınça da yörtä.

Şulay da älegä bu tör meditsina yärdäme belän qullanuçılar az. Ber köndä tüläwle aşığıç yärdäm maşinası küp digändä 3-4 çaqıru ala. Bu añlaşıla inde, aşığıç yärdäm maşinasın çaqırtu öçen genä 700 sumnan artıq aqça tülärgä härkemneñ qulınnan kilmi. Ä bu çaqıru öçen genä, yärdäm kürsätü yäğni darular birü öçen, klizma yasatqan öçen östämä tülärgä kiräk.

Tağın şunısı bar - aşığıç yärdäm dip atalsa da, älege xezmätneñ iseme cisemenä bik turı kilmi. Çönki aşığıç yärdäm ikän, ul küp digändä 20 minuttan keşe yanına kilep citärgä tieş. Ämma Qazandağı tüläwle 03 xezmäte alay tiz yörmi. Şuña kürä dä keşe ülem xälendä yata ikän, tüläwle aşığıç yärdämgä möräcäğät itäse yuq. Älege tör meditsina xezmäte xaqında Qazannıñ aşığıç yärdäm kürsätü bülege citäkçese Rämil Turayıwnıñ fikere mondıy:

Qazanda ber genä aşığıç yärdäme bar - ul 03 xezmäte. Tüläwle yärdäm kürsätsälär dä bik äybät. Keşelär tüläwle aşığıç yärdämen “kütärä” ala ikän, bik äybät, çaqırsınnar. Mondıy xezmätlär kübräk bulsa, alar keşelärgä yaxşıraq yärdäm kürsätergä tırışaçaq, dip uylıym.

Qazanda aşığıç yärdäm sorap, täwlekkä meñnän artıq keşe 03 xezmätenä şaltırata. Aşığıç yärdämgä kilüçe törkemnäreneñ sanı isä şähärdä 75 kenä. Qazandağı aşığıç yärdäm xezmäteneñ eşçänlege belän sez qänäğätme digän sorawğa Rämil Turaev bolay cawap birde:

Qänäğät tügel dip äytä almıym. Älbättä, başqa illär belän çağıştırğanda bez küpkä qalışabız. Bezdäge cihazlar, mediklarğa birelgän xezmät xaqı bik nıq ayırıla inde. Şulay da min bezneñ aşığıç yärdäm xezmätennän qänäğät tügel dip äytä almıym. Ber täwlekkä 1015-1020 çaqıru kilä bezgä keşelärdän. Aşığıç yärdäm xezmäteneñ eşçänlegen yaxşırtırğa tırışabız, monıñ öçen törle çaralar ütkäräbez.

Al'bina Zäynulla

XS
SM
MD
LG