Accessibility links

Кайнар хәбәр

Rusiä belän Gruziä arasındağı küzläw nizağı nigä zur cäncalğa äwerelde?


Ğädättä däwlätlär arasındağı küzläw nizağları diplomatiä häm saqlıq belän xäl itelä, kiñküläm mäğlümät çaraları küzenä bik eläkmi. Ämma Gruziädä Rusiäneñ 4 ofitserınıñ küzläwdä ğäyeplänep qulğa alınuı köçäyä baruçı süzlär häm yanawlar suğışına äwerelde. Bu Gruziä küzläwdä ğäyeplänüçelär belän maxsus şulay eşlime, ällä Mäskäw dä qatnaşqan Könyaq Osetiä, Abxaziä nizağları säbäple sabırın yuğaltqanmı digän sorawğa kiterä.

Rusiä belän Gruziä arasındağı ärepläşüneñ ni däräcägä citüen Rusiä prezidentınıñ yäkşämbe könne äytkännäre yaxşı kürsätä diärgä mömkin.

Putin Stalinnıñ häm anıñ maxsus xezmätlären citäklägän Berianıñ Gruziädän bulğanlığına işaräläp "Gruziädäge ğäskärlärebezne çığaru turındağı barlıq kileşülärne ezlekle räweştä ütäwebezgä qaramastan, belüegezçä, anda bezneñ xärbilärne totıp törmägä yaptılar. Bu ilneñ üzendä dä, xalıqara säxnädä dä Lavrenti Beria säyäsäten däwam itüne añlata" dide.

Gruziäneñ küzläwdä ğäyeplänüçelärne televidenie aşa kürsätüen dä küplär bik ük döres diplomatik adım tügel dip isäpli.

Şulay da düşämbe könne Tiflis totqınnarnı Yewropada İminlek wä Xezmättäşlek oyışmasına tapşırdı.

Ämma soñğı waqıyğalar, ärepläşülär säbäple qatı bozılğan mönäsäbätlär bik ozaq waqıtqa şulay qalırğa mömkin.

Rusiä totqınnarnı tapşıruına qaramastan, Gruziä belän transport häm başqa elemtälären özäçägen iğlan itte.

Mäskäw şulay uq Gruziädäge xärbilärenä kiräk oçraqta ut açarğa quştı, annan üz ilçesen häm diplomatların çığardı. Sişämbedän Aeroflot Gruziägä oçışların tuqtata.

Rusiä belän Gruziä arasında soñğı 15 yılda naçaraya barğan mönäsäbätlär xäzer şundıy ärepläşülärgä häm qılıç bolğawlarğa kilep citte.

Gruziä Rusiäne Könyaq Osetiä häm Abxaziä separatistların yaqlawda ğäyepli.

Gruziäneñ Mäskäw täesirennän çığıp Könbatışqa yaqınayu omtılışı isä Rusiäneñ açuın çığara.

Küptän tügel NATO Gruziä belän tığızraq mönäsäbätlär urnaştırırğa äzer buluın beldere.

Yewropa Berlege dä üzeneñ Kürşelek Programması nigezendä Tifliskä eş planı täqdim itte.

Gruziä prezidentı Mixail Saakaşvili "Minemçä, bu basım Gruziäneñ NATO häm Yewropa Berlege belän bäyläneşlären arttıruına qarşı yasala. Bügen min Yewropa wäkilläre belän oçraşıp Yewropa Kürşelek eş planın tämamlaw turında söyläşäm" dide.

Analitiklarnı bu küzläw nizağınıñ ni öçen şundıy zur cäncalğa äwerelüe qızıqsındıra.

Londondağı saqlanu häm iminlek mäsäläläre analitigı Paul Beaver Gruziäneñ bu ğämällären añlaw qıyın di.

"Min küzläwçelär mäxkamäse Gruziägä Könyaq Osetiä, Abxaziä nizağların çişärgä, NATO äğzalığına, yäki Gruziä telägän başqa närsälärgä ireşergä yardäm itär dip uylamıym" di Beaver.

Rusiädäge qayber analitiklar, şulay uq Putin üze bu nizağnı Rusiä belän Gruziä arasındağı nizağ tügel, ä Quşma Ştatlar belän Rusiä arasında Kafkazda täesir öçen barğan köräşneñ ber öleşe dip kürä.

Ämma Beaver Rusiäneñ doşmanlığın çığarudan Waşingtonğa ällä ni fayda bula almıy di.

"Minemçä Amerika belän Rusiä bergä bulğanda kübräkkä ireşä ala häm min AQŞ Gruziäne qullana dip hiç tä uylamıym" di Beaver.

Tiflistäge Tınıçlıq, Demokratiä häm Tärräqiät öçen Kafkaz institutı mödire Ghia Nodia isä bu säyäsi maqsatqa ireşügä xezmät itä almıy, Bu barı tik Saakaşvilinıñ üz diplomatik eş ısulın kürsätüçe närsä di.

Gruziä prezidentı cämäğätçelekkä kürsätep, demonstrativ eş itü ısulın yarata häm bu şunıñ çağılışı di Nodia.

Naif Aqlam, Praga.
XS
SM
MD
LG