Bu könnärdä Yekaterinburg şähärendä urnaşqan Ameriqa Quşma Ştatları konsullığında iftar mäclese uzdırıldı. Mäcleskä Sverdlovski ölkäsendä eşläp kilgän möselman idäräläre citäkçeläre, imamnar, törle milli oyışmalar wäkilläre, jurnalistlar çaqırılğan ide.
Qunaqlarnı sälämläp çığış yasağanda, Amerika Quşma Ştatlarınıñ Yekaterinburgtağı general' konsulı Djon Stepançuk izge ramazan ayında konsullıq tarafınnan iftar mäclesläre inde berniçä yıl rättän oyıştırılıp, matur ğädätkä äwerelde dip belderde. Anıñ äytüençä, bu xäl Amerika prezidentı häm Pentagon alıp barğan säyäsätkä turı kilä, Amerikanıñ üzendä, yuğarı dairälärdä yıl sayın izge ramazan ayında iftar mäclesläre oyıştırılıp tora. Konsul bu traditsiä kiläçäktä dä däwam itär dip belderde.
Awız açıp, namaz uqıp, mul rizıqlı tügäräk östäl yanında sıylanıp alğannan soñ, qunaqlarnı zur ekran yanına çaqırdılar. Biredä Amerika Quşma Ştatlarında möselman tormışı tarixı, bügenge köndä anda yäşäwçe möselmannar tormışı, xäzerge waqıtta anda eşläp kilgän mäçetlär turında bik mawıqtırğıç häm qızıqlı mäğlümat birelde. Annan soñ duslarça aralaşu kitte.
Pervoural'ski şähärennän kilgän imam Mansur xäzrät älege iftar mäclesennän alğan üz toyğılarnı bolay dip belderde:
Ameriqa Quşma Ştatlarınıñ Yekaterinburg şähärendäge konsullıygında uzdırılğan iftar mäclese duslıq, tatulıq atmosferasında uzdı häm küñellärdä uñay tä'sirlär qaldırdı.
