Accessibility links

Кайнар хәбәр

Novosibirskida festival ütäçäk


Novosibirski ölkäsendäge tatar milli-mädäni oyışmalarınıñ eşçänlege xaqında “Azatlıq” radiosında söylägänebez bar inde. Tıñlawçılar xäterläsä, Novosibirski şähärendä tatar mädäniät üzägeneñ däwlät strukturasında, yäğni şähärneñ mädäniät idaräse qarşında eşläwe turında beldergän idek. Üzäkneñ ştatta torğan direktorı, qayber uqıtuçıları häm metodistları belän dä tanıştırğan idek. Tatar üzäge tırışlığı belän şähär häm ölkä külämendä yıl äylänäsendä küp törle eşlär başqarıla. Bu eşlärneñ qayberlären iskä töşerep ütkändä, kalendar'dä bilgelängän bäyrämnär, “tatar qızı”, “törki çibäre” konkursları, yäşlär kiçäläre, näwrez, narduğan bäyrämnäre, tatar sänğäte konkursları, törki xalıqlar mädäniäte festival’läre, sabantuylar häm başqalar. Novosibirskinıñ Cämiğ mäçetendä ramazan ayı däwamında oyıştırılğan iftar aşların äzerläwdä dä tatar üzäge aktivistları küp öleş kertä. Ölkä külämendä ütkärelgän Sabantuy bäyrämnäre dä tatar üzäge aktivistları tırışlığı belän oyıştırıla. Biredä sabantuylar şähär külämendä genä tügel, töbäkneñ küp kenä rayonnarında häm awıllarında da oyıştırıla. Şunsı da iğtibarğa layıq, tatar xalqı öçen oyıştırılğan bäyrämnärdä başqa millät xalıqları da bik teläp qatnaşa. Bıyılğı ölkä Sabantuyında, mäsälän, tatar kollektivlarınnan tış rus, qazax, ukrain, azerdbaycan, latış häm başqa küp kenä milli kollektivlar qatnaşqan. Tatar mädäniät üzäge direktorı Roza xanım Tixomirova, bıyılğı sabantuy “Rizalıqta berdämlek tua” digän proyektnıñ qısalarında ütkärelde, şuña kürä küp törle millätlär qatnaştı,-di

Oçraşıp söyläşü forsatınnan faydalanıp, ul üzäkneñ alda torğan eş plannarı belän dä tanıştırıp ütte. Novosibirskida xäzer törki xalıqlar festivale ütkärergä äzerlänälär. Bu urında şunı iskä toşerep ütü urınlı bulır, 2004-nçe yılnı yıl elek “Azatlıq” radiosında Novosibirskida törki xalıqlarnıñ berençe festivale uzuı turında söylägän idek. Ul tatar mädäniät üzäge aktivistları köçe belän oyıştırılıp, törki xalıqlarnıñ törle icat kollektivları qatnaşlığında ütkän ide. Festival', däwlät orğannarı tarafınnan, bik yaxşı oyıştırılğan, kürkäm çara dip bilgelänep, ölkäneñ altın yılyazmalar kitabına kertelgän ide. Älege bäyrämne oyıştıruçılarğa räxmät xatları häm törle däräcädäge diplomnar birelgän ide. Törki xalıqlar festivalen bez bıyıl berniqädär başqaçaraq ütkärergä niätlibez, cır-biyu genä tügel, başqa janrlar da kürsätergä telibez,- di Roza Tixomirova.

Roza xanım süzlärençä, ikençe törki xalıqlar festivale berençesenä qarağanda küpkä külämleräk bulaçaq. Oyıştıru eşlärendä tatar üzäge genä tügel, däwlät strukturasında bulğan Tözüçelär häm Yäşlär mädäniät sarayları, Milli mädäniätlär yortı, ölkä mädäniät idäräse, kino-vidioprokat, kraynı öyränü muzeye, üzäk kitapxanä häm başqa mädäniät uçaqları qatnaşa. Annan tış şähärdä eşläp kilüçe qazax, qırğız, üzbäk, yaqut, azerbaycan oyışmaları da yärdäm itälär. Bezneñ bäyrämgä qayber respublikalardan tanılğan kollektivlarnıñ häm cırçılarnıñ kilüe kötelä di Roza xanım.

Qayber artistlarnı cibärülären ütenep Qazaxstan, Üzbäkstan prezidentlarına xatlar yulladıq di Roza Tixomirova. Tatarstannan yäş başqaruçılarnıñ kilüenä ömet bağlıy ul.

Festival' 14-18 noyäber könnärendä ütäçäk. Waqıt az qalıp bara. Alda torğan äzerlek eşläre äle bixisap. Ämma kümäk köç belän başqarıp bez anı başqarıp çığaçaqbız,- di Roza xanım.

Rozaliä Sayganova, Omski

XS
SM
MD
LG