Accessibility links

Кайнар хәбәр

Yäşeren uyın biznesı bulmayaçaq


Tatarstanda uyın tarmağı eşçänlegen cayğa saluçı qanun respublika cämäğätçelegendä zur bäxäslär quptardı. Mäsälän, “İttifaq” tatar milli bäysezlek partiäse räise Fäwziä Bäyrämova cämäğätçelekkä menä mondıy süzlär belän möräcäğät itte. “Qama Alanında atom elektr stansiäse tözi almağaç, Federal' üzäk tatarlarnı biredä uyın biznesı urnaştıru belän yuqqa çığarğa uylağannardır, möğayın”, dip yazğan Fäwziä Bäyrämova.

Älegä isä uyın tarmağınıñ eşen cayğa saluçı qanun uyın biznesı wäkilläreneñ aqça qaznasın yaptı. Älege qanun nigezendä 18 oktäberdän barlıq uyın obyektları da yabılırğa tieş. “Tatarstanda uyın biznesı yäşeren räweştä bötenläy eşlämäyäçäk!” - Tatarstan Premyer-ministrınıñ berençe urınbasarı Rawil Moratov şulay dip belderde. Şulay da, uyın biznesı xucalarınıñ barısı da älege qanunnı üz irekläre belän genä ütämägän. Firmalarnıñ yartısı ğına eşçänlek yunäleşen üzgärtügä kereşkän.

Rawil Moratov, Tatarstandağı barlıq uyın salonnarı inde yabıldı, dip äytsä dä, Qazandağı uyın avtomatlarınıñ qayberläre salım xisabınnan äle dä töşerelmägän. Nigezdä alar – Mäskäw kompaniäläreneñ wäkillekläre. Alarnıñ citäkçelege respublika qanunın Rusiäneñ Yuğarı mäxkämäsenä tikşerergä däğwä da qılğan inde. Ämma Rawil Moratov äytüençä, alarnıñ bolay tırışuları hiç yuqqa. Xakimiät çigenergä cıyınmıy.

Şulay da, xörmätle tıñlawçılar, uyın biznesı eşquarları citäkçelär belän niçek kenä köräşsälär dä, Qazannıñ at sportı kompleksına küçärgä aşıqmıylar ikän äle. Ämma anda da teläkläre bulğan eşmäkärlärneñ barısı da elägä almayaçaq. Urınnar saylap qına bireläçäk. Qazanda monı da zakon nigezendä eşlärgä tırışalar.

Alay ğına da tügel äle. Uyın biznesı yunäleşen üzgärtkän oçraqta, eşmäkärlärgä xätta yärdäm itärgä dä äzer xökümät. Ämma alar belän mädäniät binaları, qunaqxanälär, yal itü urınnarı tözü şartların kileştergän oçraqta ğına.

Şulay da Tatarstan uyın biznesı salımnarına ğına ömet itmi, annan başqa da tabış alu mömkinlekläre bar, dide Rawil Moratov.

Yarıy, şulay bulsın di. Ämma uyın biznesı şaqtıy aqçalar kiterä. Monı härkem belä inde. Annan çıqqan salımnar da az bulırğa tieş tügel. Bıyıl ğına da Tatarstanğa uyın biznesınnan salım bularaq 300 million sumğa yaqın aqça kergän. Ägär dä yaña qanun buyınça oyıştırılğan Las-Weğas, Qazanda açılıp ta, annan tağın da kübräk tabış kersä, tik ul tabış Tatarstan qaznasına kermäsä, respublika uyın biznesınnan küz dä yommıy baş tartaçaq.

Güzäl Zıyätdinova.

XS
SM
MD
LG