Rim papası Benedict 16 böten dönyadağı möselmannarnı İzge Ramazan ayı, uraza tämamlanu belän täbrikläde. Vatikandağı İzge Petr mäydanına cıyılğan xalıq aldında yäkşämbe ğıybadäte aldınnan çığış yasap, ul: “İzge Ramazan ayı betüne bäyräm itüçe barlıq möselmannarğa da yöräktän çıqqan qotlawımnı citkerüemä şatmın”,- dide.
Rim Papası Ğıyraq watandaşlarına teläktäşlek belderep, alarnıñ xälen añlap, bolay dide: “Bu bäyräm könnärendä Ğıyraqtan kilgän xäbärlär bigräk tä faciğäle bulıp işetelä. Anda sönni, şiğıy, xristian bulğannarı öçen genä dä totrıqsızlıq häm köç qullanu arqasında küplägän keşe qorban buldı”.