Accessibility links

Кайнар хәбәр

Putinnıñ turı elemtäse çirattağı par çığarumı?


Rusiä prezidentı Vladimir Putin berençe märtäbä turı efir aşa xalıq belän 2001 yılnıñ 24 dekaberendä aralaştı. Putinnıñ Yelsinnan soñ xakimiätkä kilgän çorı. İldä başbaştaqlıq. Häm näq urıs añı kötkänçä, qotqaruçı bulıp täxetkä Putin menep kilä. Kinät kenä säyäsät ofıqlarında barlıqqa kilgän Putin ğälicanäplären xalıq belän küzgä –küz oçraştırırğa bula anıñ administratsiäse. Bu çara TV, radio aşa, turı efirda, ike säğät däwamında buldı. Saylap alınğan qala wä qayber salalarda, militsiä çornap alğan TV kameraları qarşında, qullarına talon kebek käğäz kisäge totqan, şulay uq saylap alınğan keşelär sorawlar birdelär. Talonnarı isä militsiä kardonın ütär öçen röxsät kenä bulmıyça, ä äzer soraw ikänen çamalap buladır. Putinnıñ berençe märtäbä xalıq belän oçraşuı menä şulay uzdı. Oşap kitte küräseñ, 2001, 2002, 2003, 2005 nçe yıllarda da uzdı. 2004 nçe yılda şundıy xalıq belän aralaşu bulmawnı , ul yılda prezident saylawları uzuı, köndäşläre isä, prezidentnı saylaw aldınnan xezmät wazifalarınnan qullanu belän ğäyeplärläwläre ixtimal dip añlattılar. Bıyıl isä, Putin cäyen ber xalıq belän söyläşep aldı inde. Xäzer menä tağın 25 üktäberdä Rusiä watandaşları sorawlarına cawap biräçäk. Cämäğät, soraw birdeñ dä, cawabın aldıñ tiz genä dip ışanırğa kiräkmi. Bu sezgä baqça başığızdağı kürşegez tügel. İnde bügenge bügenge köngä Rusiä ilbaşına atap 600 meñ soraw tuplanğan. İnternet aşa, telefon aşa. Maxsus keşelär Prezidentqa bu sorawlarnı saylap alıp qına citkerep toraçaqlar. Şularğa ğına Putin Vladimir cawap biräçäk. Qalğannarı qala. Döres, türälär, bu sorawlarğa şulay uq yazma räweştä cawap cibäreler dilär. Işanabız. Sorawlar digännän. Älbättä xalıqnı ilküläm proyektlar, toraq-komunal' kompleksı häm şunıñ işe sotsial' problemalar borçıy. Läkin, küzätüçelär, 25 üktäberdä bulaçaq turı elemtädä milli mä’sälälär xaqında da sorawlar bulmıy qalmas dilär. Ni öçen digändä, il buylap gruzinnarnı illärenä sörü, Kandopoga şähärendäge kebek distälägän suğış oçraqları der selketä. Menä bu sorawlarğa Putin cawap birerme, anısın kürerbez. Bu bit, Rusiä xakimiäte bik ük önäp betermägän milli mäs'älälär. Menä, bıyıl cäyen uzğan turı elemtä waqıtında da, Qazannan 27 yäşlek Röstäm isemle beräw, putinğa internet aşa, Äytegez äle, urıs bulmağan xalıqlarnı assimilyatsiäläw- ul sezneñ säyäsätneñ ber maqsatımı digän soraw yullağan ide. İnternetta cawabı kürenmäde. Ä inde TV, radioda, yäğni turı elemtä waqıtında cawap bulmawı berkemne dä aptıratmadı.

Turı elemtä – şäp äyber ul. Säyäsätçeneñ reytingı öçen, xalıqnıñ parın çığarır öçen, monnan tış, il xalqın ni borçığanın da bit, şuşı yöz meñlägän sorawlardan analizlap bula.

Räfis Cämdixan

XS
SM
MD
LG