Accessibility links

Кайнар хәбәр

Putin däräcäsendäge sorawlar bar tatarstanlılarda


Qaywaqıt tuydırıp ta cibärä bu däwlät uylap çığarğan PR çaralar. Reklamalar yäğni. Läkin, ni bar-şunı söylärgä inde. Ä däwlätkä kiräk bulğaç, bulmağanında bar itälär. Menä Putin Vladimirnıñ Rusiä xalqı belän turı elemtädä buluın da, BULA, ŞALTIRAT, YAZ dip kenä qalmıyça, qızıqtırır öçen, niçek kenä qılanmıylar. Räsmi TV kanalları inde nindi apparaturada eşläyäçäk efir, nindi cihazlar quyılğan – şuña qädär söyli başladılar. Tilegä tile dip torsañ, tigänä aşa sikerä di tatar äyteme. Yäğni qabatlap torğan sayın ışandıru mömkinlekläre artu turında inde bu. Zamança PR, reklamanıñ mexanizmın açıp birgän bu mäqäl bu oçraqta bik urınlı. Qabatlıy-qabatlıy, xalıq bu turı efirdan da kiräkle äyber yuq bu könnärdä ikänlegenä inana bara tösle. Çönki, düşämbe könne inde Putinğa dip 600 meñ keşe soraw yullağan bulsa, sişämbedä isä bu san 1 million 300 meñnän arttı. Şularnıñ 60 meñe internet aşa bulsa, qalğanın xalıq telefonnan birgän. Ğädät inde ul. Sorawlarnı äytüem. Awıl başlığı, rayon glavasına birelä torğan sorawlarnı Putinğa yullıylar. Mäsälän, tegendä küper cimerelde, bezneñ rayon başlığı qaraq, bezneñ şähärdä fatirlar qıybat… Mondıy sorawlarnı meñärlägän kiterep bula. Putin Vladimir da bolarğa cawap birep tormas. Saylap alınğannarına ğına inde. Eş şunda ki, turı elemtä üzägendä ayırım ber törkem eşläyäçäk. Alar sorawlarnı saylap utıraçaq. Million 300 meñ soraw – bu soñğı çik tügel. Äle turı efirğa qädär . yäğni 25 ütkäberneñ Qazan waqıtı belän köndezge 12 gä çaqlı waqıt bar. Annarı xalıq, TV aşa qarap, sorawlarğa cawap birer dip ömetlänep şuşı çara waqıtında da sorawlar ağızaçaq qına. Cawaplar digännär. Putin, efirda yañğırağan sorawlarğa cawap birä, ä alar här waqıt ütälmi ikän. Mäsälän, qayber jurnalistlar, Putinnıñ şundıy başqa yıllardağı cawapları niqädär ütälgänne tikşergännär. Küpçelege ütälgän dilär. Bu efirda yañğırağan cawaplar. Läkin, ütälmägännäre dä citärlek ikän.

Azatlıqnıñ Qazan byurosına, isemen atamawnı ütenep, berniçä keşe şaltırattı. Alar, mömkin bulsa, Putinğa şundıyraq sorawlar birer idek dip belderälär. Yuq, yuq, küper dä, fatir probleması ğına tügel. Rusiä prezidentı alıp barğan säyäsät buyınça ikän. Nindi sorawlar soñ ul şul qädär disezme? Alay uq qatlawlı wä säyäsi qurqınıç söällär tügel ul. Mäsälän, Putin, sişämbedä Piterburda çığış yasap, Latviädäge berniçä yöz meñ urısqa watandaşlıq birelmäwenä borçıla. Şul uq waqıtta, millätläre belän abxaz bulğan, yuridik Gruziä cire sanalğan Abxaziäneñ küpçelek xalqına Rusiä pasportı öläşelgän.Ä ni öçen, imeş räncetelgän Latviä urıslarına da Rusiä watandaşlığı birep, rusiägä çaqırmasqa? Tağın ber soraw. Şaqtıy üzençälekle wä alay uq demokratik bulmağan ısullar belän xakimiätkä kilgän Başqortstan prezidentı Mortaza Räximovnı tağın ber märtäbä prezident itep bilgeläw Putinnıñ namusın berdä kimermi mikän? Ğomumän, näq prezident däräcäsendäge sorawlar inde. Tıñlawçılarıbızğa, bu sorawlarnı prezidentqa yullağız digän cawap qänäğätländermäde. Cawap bulmas bu sorawlarğa didelär. Nu monısı inde anıñ wä yärdämçelärneñ irkendä.

Niçek kenä bulmasın, İlbaşınıñ xalıq belän aralaşuı qızıq. Ä anı küzätep toru tağı da qızığraq. Äle bit Rusiä TV kanalları , saylap alınğan sorawlarğa bulsa da turı efirğa prezidentı çığarırğa cör'ät itälär. Ni öçen digändä, xäzer süz irege Rusiädä bik awırdan tora ikän. Menä, sişämbedä “Çiklärne ütüçe reporterlar” dip atalağan xalıqara jurnalistlar oyışması süz irege buyınça rusiä dönyada 147 nçe urında tora dip belderde. Bu barlığı 168 il arasında. Nu anısı inde prezident xätle prezidentqa da süz irege qısılmas. Prezidentlar bit il belän idärä itä.

Räfis Cämdixan

XS
SM
MD
LG