Bügenge köndä zavod häm oyışmalarda kübesençä olı yäştäge keşelär eşli. Tik alar da ğömerlek tügel, tizdän alarğa da layıqlı yalğa kitär waqıt citäçäk. Ämma ildä bu eşçelärne alıştır keşe yuq diärlek. Bügenge köndä Tatarstannıñ xezmät bazarına 25 meñnän artıq äzerlekle eşçe kiräk. Yäşlär dä zavodlarda ğadi eşçe bulıp eşlärgä aşqınmıy. Mäktäpne tämamlaw belän, uquçılar yuğarı uqu yortlarına imtixan birä. İmtixanın ikelegä birsä dä, hönäri uqu yortlarına barmıylar. Aqça tüläp bulsa da, yuğarı uqu yortlarına yurist, menedjer, iqtisatçı hönären alırğa kerälär. Ä kiräkle 25 meñ ğadi eşçe keşene qaydan alırğa soñ? Tatarstan Mäğärif häm fän ministrlığı başlanğıç hönäri belem birüne üsterü bülege başlığı Nail Xämidullin söyli.
Xezmät ministrlığı birgän sannarğa qarağanda, bezneñ 2007 yılğa başlanğıç hönäri belem belän 25 meñläp keşe kiräk. Monda layıqlı yalğa çığıp kitüçelärneñ sanı häm bügenge köndä vakantlı urınnar sanı isäpkä alına. Bügenge köndä iñ kiräkle keşelär: toqar'lar, eretep yabıştıruçı, slesar'lar, taşçılar häm başqalar. Älege hönärlärgä 15-20 meñ keşe kiräk. Alarğa ixtıäc zur. Respublikabızda xäzer 96 başlanğıç belem birü uqu yortı bar. Bügenge köngä alar üzlärenä unaltı meñ yarım uquçılar cıydı. Tatarstanda barlığı 41 meñgä yaqın bala uqı. Yıl sayın bez 16-17 meñ hönärçe äzerläp çığarabız.
Niçek kenä bulmasın, ä eş birüçelär yäşlärne cälep itärgä tırışa. Işanıçlı eş urını, toraq belän tä'min itü, kiläçäktä yuğarı uqu yortlarında uqunı däwam itü kebek wäğdälär birergä cıyına xökümät yäşlärgä. Ä xäzergä ilgä eşçelär citmi. Tik ildä eşsezlär sanı yuğarı. Citmäwçe eşçelär urınına Urta Aziä, Kavkaz, Törkiädän kilüçelärne eşlätälär. Ä bu cirle xalıqqa oşamıy. Şulay itep, sin dä mulla, min dä mulla, atqa peçän kem sala, digän mäqälä bügen yış iskä töşä.
Güzäl Zıyätdinova.
