Üktäber ayında Omskida Pedagogiä marafonı ütkärelde. Ölkä Mäğärif ministrlığı tarafınnan inde öçençe märtäbä oyıştırılğan bu çara ğädättä ber ay däwamında bara. Düşämbe könne älege marafon qısalarında “Tellär häm mädäniätlär dialogı” digän temağa etnomädäni komponentlı mäktäplär uqıtuçısı köne buldı. Anıñ eşendä ölkäneñ awıl-rayonnarı häm şähär mäktäpläreneñ tuğan tel uqıtuçıları, Mädäniät ministrlığınıñ din häm milli säyäsät komitetı belgeçläre, tatar, qazax oyışmaları wäkilläre häm qayber irekle tıñlawçılar qatnaştı.
Pedagogiä marafonınıñ milli belem birügä bağışlanğan älege çarasınıñ açu öleşendä “Omski ölkäsendä milli mönäsäbätlär” digän temağa doklad yañğıradı. Anda ölkädä millätara mönäsäbätlärneñ tınıç buluı assızıqlandı, milli-mädäni oyışmalarnıñ eşçänlegenä qısqaça küzätü yasaldı, ğomum alğanda, ölkädäge milli mädäniätlär üseşenä uñay bäyä birelde.
Bol'şereç'ye rayonı Ülänkül mäktäbeneñ rus tele uqıtuçısı Zälifä Raxmangulova rus tele däreslärendä tatar ädiplären kürsätü mömkinlekläre turında doklad belän çığış yasadı.
Annan soñ, etnomädäni komponentlı mäktäplär uqıtuçısı köne programmasında qaralğança, tatar, qazax, nemes telläre buyınça master-klasslar buldı, axırda etnomädäni komponentlı mäktäplärdä rus häm tuğan tellärne uqıtu problemaları buyınça fiker alışu ütte .
Tatar tele buyınça Ğabdulla Tuqaynıñ tormış yulına, icatına bağışlanğan açıq däres – master-klassnı 1-nçe sanlı pedagogiä kolliäteneñ tatar tele uqıtuçısı Gölsinä Äxmärova ütkärde. Däres barışında Tuqaynıñ 120 yıllığı uñayınnan çığarılğan interaktiv kitap qullanıldı, kolliät studentları şağirneñ äsärlärennän özeklär uqıdılar, “Umırzaya” üzeşçännäre Tuqay şiğırlärenä icat itelgän cırlar başqardılar.
Däresneñ yomğaqlaw, fiker alu öleşendä awıllardan kilgän uqıtuçılar mondıy mömkinleklär bezdä dä bar, komp'yuterlar bar, älegä bezneñ qullanıp qarağanıbız yuq didelär.
Fiker alışu waqıtında Tevriz rayonınıñ Tuyçı awılı mäktäbe uqıtuçısı Al'bina Mozaffarova, tatar tele däresläreneñ atnağa ber säğätkä genä qaldırıluı, bıyıldan uqıtu programmasına kertelmäwe turında borçılıp äytte.
Tara rayonında da şundıy uq xäl. Bu xaqta Turalı awılı mäktäbeneñ tatar tele uqıtuçısı Finnura İnayatova bäyän itte. Alarğa cawap itep Ülänkül mäktäbe mödire urınbasarı Rimma Maçitova, xäzer mäktäplärgä bazisnıy plan birelä, teläk bulsa tatar tele däreslärenä waqıt tabarğa mömkin, däreslär birergä dä mömkinleklär – kitaplar, äsbaplar bar dip belderde,
Rozaliä Sayganova, Omski
