Accessibility links

Кайнар хәбәр

Semberdä Qol Ğali häykäle buldıru çaraları kürelä


“Bolğar yañarışı” häm “Tuğan tel” oyışmaları küptän inde monı xästärlilär. 2003-yılda, bu böyek şäxesneñ 820 yıllığına açarğa ide anı. Şähär Duması fatixa birgäç, urını da bilgelängän ide. Xakimiät almaşınu arqasında bu tırışlıqlar sünderelde. Xäzer isä Qol Ğalineñ tuuına 825 yıl tuluğa bu xıyalnıñ tormışqa aşuına yänä ömetlär uyandı. Şäwkät Bogdanov tırışlığı belän ölkäneñ yuğarı abruylı şäxeslärennän torğan initsiativ törkem tözelde. Anıñ isemennän meriägä tapşırılğan möräcäğät uñay qaraş taptı: qarşı tügel, urın saylağız, digännär.

Atqazanğan uylap tabuçı, grek-rim köräşe buyınça tanılğan trener Nuriazdan Aliev üz qaraşınnan qulay urınnarnıñ fotoräsemnären äzerlägän. Şularnı tikşerü öçen initsiativ törkem cıyıldı. Xäzer ul oyıştıru komitetı dip atalırğa tieş, digän qararğa kildelär. Ä urın saylaw buyınça küp yıllar şähärneñ baş arxitektorı bulıp eşlägän Ramil Valyutkin fikerenä tayanırğa, didelär. Häm anıñ qatnaşlığında 5 keşedän torğan prezidiumın sayladılar. Prezidium meriägä 3 - 4 variant täqdim itärgä tieş. Çönki ber genä bulsa, anı kire qaqqan oçraqta tağın busağalar taptarğa turı kilüe ixtimal.

Şäwkät Bogdanovqa mäğlümäti nigezlämä äzerläw yöklände. Citäkçelekne häm xalıqnı bu böyek şäxesneñ eşçänlege belän tanıştıru, dimäk, häykälneñ kiräklege isbat itü öçen. Şulay uq Qol Ğaligä bağışlanğan kesä kalendar’ı çığarıp xalıqqa taratırğa buldılar. “Aq bars” bankınıñ Ul'yan filialında xäyriä isäp-xisabı açu turında da qarar qılındı.

XS
SM
MD
LG