Rusiä prezidentı Vladimir Putin häm Mısır prezidentı Xösni Möbäräk Mäskäwdä ütkän oçraşuda Yaqın Könçığıştağı xälne cayğa salu turında söyläşkän. Şulay uq ike yaqlı xezmättäşlekne kiñäytü dä tikşerelgän. Möbäräk Mısırda Rusiä eşquarlarına taşlamalı, irekle iqtisadıy töbäk buldırırğa cıyınuları turında da äytkän. Bu oçraşudan soñ Putin “Bez Mısır prezidentı belän xezmättäşlekneñ ayırım tarmaqları turında bik täfsille itep häm şulay uq xalıqara säyäsätneñ bigräk tä sizemle yaqları turında da söyläştek. Şul uq waqıtta Mısır bezdä zur qızıqsınu uyata häm tışqı säyäsätebezdä dä aña zur ixtibar birelä. Mısır ğäräp, İslam dönyasında iñ ähämiätle xezmättäşlärebezneñ berse bulıp qala”,- dide.
