Accessibility links

Rusiä gazı öçen kem küpme tüli?


Gazpromnıñ 2 noyäberdä Gruziä öçen tabiği gaz bäyälären 2 märtäbädän dä artığraqqa kütärü turında belderüe yaña taktikağa küçüne añlatmıy. Rusiä kürşe illärgä gaz bäyälären yış üzgärtep tora. Häm ul bäyälär ilenä qarap ber-berennän şaqtıy ayırıla. Qayber küzätüçelär Gazpromnı bäyä ayırmasın säyäsi maqsatlarda qullanuda ğäyepli.

Bıltır soñğı distälärçä yıldağı iñ salqın qış urtasında Gazprom 2006 yıl öçen Ukrainağa gaz bäyäsen 4 märtäbä kütärergä teläwen belderde. Küp kenä küzätüçelär monı Kievnı yöze belän könbatışqa taba borılğan öçen säyäsi cäzalaw çarası dip bäyäläde. Qış urtasında Ukrainağa gaz qudıru berniçä köngä tuqtatılğannan soñ taraflar meñ kubometr gaz bäyäsen 95 dollar dip bilgelärgä kileşte.

Bu yılda da Gazprom gaz söyläşülären kürşe illärgä dä bäyälärne Könbatış Yewropa bäyälärenä yaqınaytu maqsatı belän başladı.

Könbatış Yewropa meñ kubometr gaznı 230-250 dollardan ala. Gazprom kiläse yıl başınnan Latvia, Belarus, Ukraina häm inde xäzer Gruziä öçen dä şundıyraq bäyälär quyırğa teläwen belderde.

Älegä Gruziä anı 110 dollardan ala. Ämma söyläşülär näticäsendä dikäber ayında ireşelergä tieşle kileşüdä yaña bäyä 230 dollar uq tügel, beraz kimräk bulırğa da mömkin.

Başqa elekke Sovetlar berlege arasında bıyıl gaznı iñ arzanğa qaluçı il Belarus. Ul meñ kubometr gaz öçen 47 dollar tüli. İñ yuğarı bäyäne Moldova, 160 dollar tüli.

Baltıyq buyı illäre gaznıñ meñ kubometrın 120-140 dollarğa ala.

Ämma 2007 yıldan elekke sovet respublikalarınıñ kübese öçen bäyälär artır dip kötelä. Gaznı barı tik Rusidän genä aluçı Moldovadan 2007 yılda meñ kubometr gaz öçen 170 dollar sorala.

77 protsent gazın Rusiädän aluçı Ukraina qatnaştırılğan Törkmän-Rusiä gazı öçen yaña yıldan kubometrına 130 dollar tuläw turında kileşte.

Ä menä moñarçı iñ arzan bäyä 47 dollar tülägän Belarus öçen Gazprom yaña yıldan bäyäne 200 dollarğa kütärergä cıyınuın belderde.

Latviägä isä Gazprom yaña yıldan gaznıñ bäyäsen 217 dollarğa qädär kütärergä teli.
XS
SM
MD
LG